Кэпсэтии сүнньүн доруобуйа харыстабылын систиэмэтин инники күөҥҥэ турар ситимэ — профилактика ылла. Тэрээһини РФ Уопсастыбаннай палаататын чилиэнэ Ольга Татаринова уонна уопсастыбаннай палаата чилиэнэ Наталья Пахомова сатабыллаахтык салайдылар. Кыттааччылары РФ Уопсастыбаннай палаатын профильнай хамыыһыйатын бэрэссэдээтэлэ Николай Дайхес видео-сибээһинэн эҕэрдэлээтэ, оттон СӨ доруобуйа харыстабылын миниистирин солбуйааччы Татьяна Павлова демография боппуруостарыгар тохтоото.
Бу далааһыннаах мунньахха Горнай улууһун киин балыыһатын клиническэй психолога Сахаайа Прокопьевна Платонова кытынна. Кини санаатын маннык үллэстэр: «Биһиги Горнайтан 10-ча буолан кэллибит. Араас былаһаакталарынан арахсан үлэлии сылдьабыт. Доруобуйа харыстабылын миниистирин солбуйааччыта Татьяна Павлова оҕолонууга уйулҕа өттүнэн үлэлэргэ улахан болҕомто уурда, кини дакылаатын олус сэргээтим. Оҕо түһэртэриитин көрдөрүүтэ биһиги Сахабыт Сиригэр, ордук кыра, аҕыйах ахсааннаах норуоттарга, олус охсуулаах. Онон ийэ буолар кыргыттары, дьахталлары кытары үлэ отой эрдэ ыытыллыахтаах”.
Кыыс-уол оҕоҕо оскуола саастарыттан төрөтөр кыахха эппиэтинэстээхтик сыһыаннаһарга үөрэтии булгуччулаах. «Эрдэттэн быһаарсар, өйдүүр киһи итинник ыарахан быһаарыыны ылыммат. Бу — биһиги нэһилиэнньэбит сайдыытын мэктиэтэ», — диир кини.
Площадкаҕа билим холобурдара элбэҕи кэпсээтилэр. Эспиэрдэр игирэлэр генетическай эспэримиэннэри сырдаттылар: 40 сыл устата табахтаабыт киһи сирэйэ төһө уларыйарын, килиимэт дьайыытын уонна ас хаачыстыбата эккэ-хааҥҥа хайдах суруллан хааларын илэ харахтарынан көрдүлэр.
«Эн тугу сиигин даҕаны, ол барыта эн сирэйгэр, эккэр-хааҥҥар көстөр эбит. Холобур, үчүгэй хаачыстыбалаах ас туруккун бөҕөргөтөр, — диэн Сахаайа Прокопьевна семинартан бэйэтигэр сүрүн түмүгү оҥоһунна. — Маны таһынан, эт-хаан өттүнэн хамсаныы улахан суолталаах. Киһи күн аайы хамсанар, хаамар буоллаҕына, мэдиссиинэ өҥөтүгэр наадыйымыан сөп эбит. Күн сардаҥата эмиэ тириигэ улаханнык дьайарын игирэлэр холобурдарынан көрдөрдүлэр.
Барыта олус интэриэһинэй. Итинник улахан билиилээх исписэлиистэр кэпсииллэрэ, дьоҥҥо тарҕаталлара — улахан табыгастаах түгэн. Биһиги бу билиибитин нэһилиэкпит аайы тиийэн тарҕатыахпыт, үлэлэһиэхпит. Чэгиэн кырдьыы — соҕотох билим эрэ буолбатах, бу — хас биирдиибит күн аайы олоруубут, талан ылыыбыт», — диэн кини түмүктээтэ.
Санатан эттэххэ, Дьокуускайга атырдьах ыйын 25–26 күннэригэр эрэгийиэн уопсастыбаннай олоҕун сүрүн тэрээһинэ — Гражданскай пуорум ыыттылла турар.
Тэрээһин үс бэлиэ даатаҕа ананар: Арассыыйа Бэдэрээссийэтин Норуоттарын сомоҕолоһуутун сылыгар, Саха Өрөспүүбүлүкэтигэр Култуура сылыгар уонна Саха Өрөспүүбүлүкэтин Уопсастыбаннай палаататын 15 сылыгар. Пуорум былаас, кэмиэрчэскэйэ суох тэрилтэлэр, ыччат холбоһуктара, үтүө көмөһүттэр уонна актыыбынай дьон кэпсэтэр, кыһалҕалары ырытыһар сүрүн былаһааккаларынан буолар.
Галина Матвеева хаартыскаҕа түһэриилэрэ
-
0
-
0
-
0
-
0
-
0
-
0
