Сүрүн дакылааты Уопсастыбаннай палаата бэрэссэдээтэлэ Станислав СеменовичИванов туруорда.
Кини иһитиннэрбитинэн, Сахабыт Сиригэр уопсастыбаннай палаата устуоруйата 2011 сыл муус устар 25 күнүттэн саҕаламмыт. Бу кэмтэн ыла Уопсастыбаннай палаата былаас уонна норуот икки ардыларыгар эрэллээх далаһанан буолла.
«Бу үбүлүөйдээх сылга биһиги көҕүлээһиннэрбитин өйүүрүн иһин Ил Дархан Айсен Сергеевич Николаевка дириҥ махталбын биллэриэхпин баҕарабыт. Биһиги уһун суолу аастыбыт — маҥнай симик этиилэртэн, 2015 уонна 2023 сылларга ыытыллыбыт улахан пуорумнары олоххо киллэриигэ тиийэ, онно тыһыынчанан сахабыт дьоно кыттыбыта», - диэн тоһоҕолоото.
Дакылаакка билиҥҥи кэм тургутууларыгар үлэҕэ ураты болҕомто уурулунна. Анал байыаннай дьайыы саҕаланыаҕыттан Уопсастыбаннай палаата сомоҕолуур суһал штабка кубулуйда. 2021 сылга ойуур баһаардарын утары охсуһар кэммитигэр бүтүн уопсастыбаннай үтүө көмөһүттэр ыстааптара, ДНР уонна ЛНР олохтоохторугар гуманитарнай көмөнү хомуйар пууннар, ону тэҥэ быстах мобилизацияламмыт дьоҥҥо юридическай уонна уйулҕа өттүнэн көмөнү оҥорор Координационнай киин тэриллибиттэрэ.
Нассынаалынай бырайыактары олоххо киллэриини хонтуруоллааһын сүрүн хайысханан хаалар. Бэрэссэдээтэли солбуйааччы Валентина Кириллина салалтатынан 11 хайысханы хабар Координационнай сүбэ үлэлиир.
Былаһаакка көдьүүстээҕин Гражданскай пуорум чаҕылхай холобура көрдөрөр. Ааспыт сыллааҕы резолюция түмүгүнэн номнуо маннык чопчу ситиһиилэр бааллар. Олортон холобурдаатахха:
Бойобуой дьайыылар бэтэрээннэригэр босхо эмтэр испииһэктэрэ кэҥэтилиннэ (РФ Бырабыыталыстыбатын 3867-р №-дээх дьаһала);
Таас-Үрэх сэлиэнньэтигэр сир баайын хостуур тэрилтэлэр үптэрин суотугар элбэх хайысхалаах култуура киинин тутуута бара турар;
Хаҥалас улууһун оскуолаларыгар оҕолор ортолоругар патриотическай бырайыактар грант куонкурустара олоххо киирдэ.
Билигин Уопсастыбаннай палаата — сүбэлиир эрэ уорган буолбатах. Бу — улуустар баһылыктарын дуоһунастарыгар хандьыдааттары таһаарар бырааптаах үнүстүүт, быыбардарга 2000-тан тахса үөрэтиллибит уопсастыбаннай кэтээн көрөөччүлэрдээх куорпус уонна социальнай сайдыы тиэмэтин туруорар эспиэрдэр бөлөхтөрө.
Пленарнай мунньах Саха Өрөспүүбүлүкэтин 2026 сыллааҕы Гражданскай пуорумун Саҥа Резолюциятын ылыынан түмүктэннэ. Былаһааккалар кыттыылаахтара Арассыыйа суверенитетын бөҕөргөтөргө уонна төрөөбүт Сахабыт Сирэ чэлгийэ сайдарыгар туһуламмыт этиилэри киллэрдилэр.
Санатан эттэххэ, атырдьах ыйын 25-26 күннэригэр Дьокуускайга эрэгийиэн уопсастыбаннай олоҕун сүрүн тэрээһинэ — Гражданскай пуорум ыытылынна. Тэрээһин үс бэлиэ даатаҕа ананар: Арассыыйаҕа Норуоттар сомоҕолоһуутун сылыгар, Саха Өрөспүүбүлүкэтигэр Култуура сылыгар уонна Саха Өрөспүүбүлүкэтин Уопсастыбаннай палаататын 15 сылыгар. Пуорум былаас, кэмиэрчэскэйэ суох тэрилтэлэр, ыччат холбоһуктара, үтүө көмөһүттэр уонна актыыбынай дьон кэпсэтэр, кыһалҕалары ырытыһар сүрүн былаһааккаларынан буолла.
Ааптар хаартыскаҕа түһэриилэрэ.
-
0
-
0
-
0
-
0
-
0
-
0
