Былаһаакканы Саха Өрөспүүбүлүкэтин Дьахталларын тэрилтэлэрин сойууһун бэрэссэдээтэлэ, Арассыыйа Дьахталларын сойууһун бюротун чилиэнэ Анжелика Егоровна Андреева, «Арассыыйатааҕы дьиэ кэргэн» Национальнай уопсастыбаннай кэмитиэт Саха Сиринээҕи салаатын салайааччыта Лена Павловна Ефремова, үлэ уонна социальнай сайдыы миниистирин солбуйааччыта Елена Юрьевна Теплякова салайдылар.
Анжелика Андреева дьахтар хамсааһынын билиҥҥи кэмҥэ сүрүн оруолун тоһоҕолоон эттэ: «Саха Сирин дьахталларын тэрилтэлэрин сойууһун аатыттан тыл этиибэр биири бэлиэтээтим: билигин уонна өрүү даҕаны биһиги эр дьоммутун, аҕаларбытын, уолаттарбытын өйүүр күүстээх тирэх буолуохтаахпыт. Анал байыаннай дьайыы бара турар кэмигэр, биһиги дойдубут эрэллээх тыыла буолабыт. Биһиги сорукпут — оҕолорбутугар, кэргэттэрбитигэр, аҕаларбытыгар, уолаттарбытыгар куттала суох уонна бөҕө тыылы тэрийии», -- диэтэ.
"Көрсүһүү сүрүн дьоруойдарынан элбэх оҕолоох дьиэ кэргэттэр, доруобуйаларыгар хааччахтаах оҕолору иитэр эдэр төрөппүттэр буоллулар. Улахан үлэни-хамнаһы көрсөллөр да, кинилэр тыллара-өстөрө сырдык санаанан салайтарар. Ордук болҕомтону эр киһи-аҕалар кэпсээннэрэ тарта. Кэпсээччилэртэн биирдэстэрэ, төрдүс оҕото төрөөбүтүн кэнниттэн дьиэ кэргэн биисинэһин аспыт эдэр аҕа. Кини олус уйадытардык бииргэ үлэлээһин философиятын билиһиннэрдэ: «Мин, биллэн турар, уопуттаах урбаанньыт буолбатахпын, ол эрээри кэргэним уруккуттан уопуттаах. Төрдүс оҕобут төрөөбүтүгэр, дьиэ кэргэн биисинэһин тэринэргэ быһаарыммыппыт. Билигин бары бииргэ үлэлиибит. Дьиэ кэргэнинэн бииргэ үлэлиир — бу дьол буолбатах дуо?». Бу иннинэ кини бүддьүөт тэрилтэтигэр үлэлиирэ, инньэ гынан сарсыарда тоҕустан киэһэ алтаҕа диэри дьиэтигэр суоҕа, дьиэ кэргэммэр бириэмэм ситэтэ суоҕа диэн эттэ", - диэн Анжелика Егоровна санаатын үллэһиннэ.
Былаһаакка кыттыылаахтара демографическай бэлиитикэ ситиһиитэ үбүнэн-харчынан өйөбүлтэн эрэ тутулуга суоҕун, ону таһынан уопсай өй-санаа уларыйыыта ирдэнэрин эттилэр. Манна элбэх оҕолоох дьиэ кэргэн ыстаатыһа уонна эппиэтинэстээх аҕа буолуу киэн туттуу төрүөтэ буолуохтаах диэн этилиннэ.
Ааптар хаартыскаҕа түһэриилэрэ
-
2
-
0
-
0
-
0
-
0
-
0
