Быйылгы күрэххэ уопсайа 16077 сайаапка киирбитэ. Ону анал хамыыһыйа сыныйан көрөн баран, 9763 үлэни эрэ аһардыбыта. Күрэх бэйэтэ түөрт улахан түһүмэхтээх. Онтон бастакы түһүмэҕэ бэс ыйын 1 күнүгэр түмүктэммитэ. Бэс ыйын 15 күнүгэр иккис түһүмэҕин кыайыылаахтарын ааттара номнуо билиннэ, ол иһигэр бэйиэт, прозаик, литературнай кириитик, публицист, тылбаасчыт, норуоттар икки ардыларынааҕы суруйааччылар сойуустарын түмсүүлэрин чилиэнэ, СӨ суруйааччыларын сойууһун чилиэнэ, “Саха сирин суруйааччылара” ассоциация кыттыылааҕа, РФ суруналыыстарын сойууһун чилиэнэ, “Күрүлгэн” уус-уран сурунаал сүрүн эрэдээктэрэ Афанасий Гуринов-Арчылан “Бог-Тангара Басылая Тонгсуо” диэн историческай чахчыларга олоҕурбут кэпсээнэ киирдэ.
Бу олус умсугутуулаах кэпсээн Аҕа дойду сэриитин кыттыылааҕа Василий Давыдович Иванов дьикти дьылҕатыгар олоҕуран суруллубут.
– Бу кэпсэнэр Тоҥсуо Баһылайдыын суруналыыс Мария Павлова кэпсэтэн ахтыы суруйбута. Ону көҥүллэтэн туһаммытым. Сахалыы бу кэпсээн арыый уһун, “Күрүлгэн” сурунаал саҥа нүөмэригэр толору бэчээттэнэн таҕыста. Онтон кэпсээни салгыы сайыннаран, сэһэн оҥорор былааннаахпын. Василий Давыдович-Тоҥсуо Баһылай олус дьикти дьылҕалаах киһи. Икки ийэлээх, үс аҕалаах, сэриигэ бэйэтэ тылланан барар, хараҕынан мөлтөх эрээри бастыҥ разведчик буолар, Нюрнберг суутун кэмигэр харабылынан турар. Эрдэ кини “Я вернусь” диэн ахтыытыгар тирэҕирэн нууччалыы улахан пьеса суруйбутум. Ону күрэх ирдэбилэ кытаанах буолан, дэлби кылгатан, өрө-таҥнары саамылаан, эбэн-сабан биэрэн кэпсээн оҥорбутум. Салгыы, Владимир Федоров кыладыйан биэрэн бу таҕыста.
Сахалыытыгар Васютка диэн полка уола (сын полка) баар. Кини уобараһын эмиэ айан киллэрэн биэрбитим. Санаабар, үчүгэй түгэн буолан таҕыста. Ол нууччалыытыгар суох. Бэҕэһээ бу кэпсээн Арассыыйа “Герои Великой Победы” диэн уус-уран күрэҕин “уһун лииһигэр” киирбитин туһунан биллэрдилэр. Ол аата, финал иннинээҕи түһүмэххэ киирбит. Күрэхтэһээччи элбэх. Тыһыынчанан киһи. Онон салгыы үһүс түһүмэх түмүктэрин күүтэбит. От ыйын 15 күнүгэр диэри биллиэхтээх, – диэн Афанасий Гаврильевич кэпсээтэ.
Кэпсээни бу сигэнэн киирэн ааҕыаххытын сөп.
-
0
-
0
-
0
-
0
-
0
-
0
