Олохтоох дьаһалта көҕүлээһининэн "Үрүҥ ас" диэн акцияҕа эдэр ыаллар Мария уонна Сергей Макаровтар, Яна уонна Айтал Васильевтар, Кристина уонна Илья Мохначевскайдар, Яна уонна Ньургун Габышевтар, бааһынай хаһаайыстыбалар Валентина уонна Николай Березкиннар, Ангелина уонна Геннадий Говоровтар уолларын Дьулустуун бөһүөлэккэ олорор бэтэрээннэргэ бэйэлэрэ оҥорон таһаарар бородууксуйаларын бэлэх оҥорон туттардылар.
«Биһиги бэтэрээннэрбит Анастасия Шарина, Вера Заровняева, Егор Черкашин, Василий Сотников, Иван Стручков, Ксения Черкашина уонна бэтэрээн учуутал Марфа Харитонова – биһиги саамай ытыктыыр дьоммут буолаллар. Кинилэр сыралаах үлэлэрин, дьоһун олохторун биһиги үрдүбүтүгэр күннээх халлаан баар буоларын туһугар уурбуттара”, - диэн Балыктаах нэһилиэгин олохтооҕо Мария Захарова нэһилиэк олоҕор буолар үтүө сонуннарын үллэстэр.
Маны сэргэ дьаһалта үлэһиттэрэ Сарана Артемьева, Михаил Барабанов үлэ-тыыл бэтэрээннэригэр кэлбит Арассыыйа Бэрэсидьиэниттэн, өрөспүүбүлүкэ Ил Дарханыттан кэлбит эҕэрдэ суруктары, мэтээли, бэлэхтэри туттардылар.
Сынньалаҥ киинин Кулууп инстаграмыгар Аҕа дойду Улуу сэриитигэр кыргыспыт биир дойдулаахтарыгар аналлаах кэриэстэбил акция ыытылла турар. Онно бэтэрээннэр оҕолоро, аймахтара дьоннорун туһунан истиҥ-иһирэх ахтыыларын, хаартыскаларын ыытан, дьон-сэргэ, ыччат көрүүтүгэр таһаараллар. Сэрии ыар сылларын өйдөөн-санаан ааһалларыгар, куруук ытыктабыллаах сыһыан баар буоларын туһугар бу үчүгэй хамсааһын. Улуу Кыайыы сылыгар анаан олохтоох дьаьалта 17 баннеры оҥотторон бөһүөлэккэ киириигэ, киин уулуссалар көстүүлээх сирдэригэр ыйаатылар. Ити курдук араас харгыстары аахсыбакка, Кыайыы күнүн көрсө араас хабааннаах үлэ хас биирдии нэһилиэккэ көхтөөхтүк барара Кыайыыны уһансыбыттарга дириҥ махтал, үтүө сыһыан буоларын туоһулуур.
-
0
-
0
-
0
-
0
-
0
-
0
