Эһиилигэр 1944 с. муус устарыгар салаат ийэтигэр Пелагея Васильевнаҕа хамандыыр аатыттан хомолтолоох сурук кэлбит, уол Псковскай уобалас Выселки сэлиэнньэтигэр өстөөх снарядыттан быһынна уонна көмүс уҥуоҕа харалынна диэн биллэрбиттэр. Ол кэмтэн ыла 80-тан тахса сыл тухары халыҥ хаар үллүктүү түһэн уулунна эрээри, ССРС полевой буостатын бэчээтэ баччааҥҥа диэри суураллыбакка сылдьара сөхтөрөр, дьон буочарын өйдөөн көрдөххө, киһи ис хоһоонун өйдүүр. Хомолтолоох суругу ийэ барахсан өр кэмҥэ харайа сылдьан баран түмэлгэ туттарбыт.
Ньурбаҕа Октябрьскай нэһилиэккэ (Антоновкаҕа) Наумовтар диэн үс бырааттыылар олорбуттара. Убайдара Гурий Васильевич 1905 с. Иркутскай уобалас Чикан сэлиэнньэтигэр күн сирин көрбүтэ, икки саастааҕар ийэлээх-аҕата Антоновкаҕа көһөн кэлбиттэрэ. Уол оскуола кэннитэн Москубаҕа Ленин аатынан байыаннай-бэлитиичэскэй академияны бүтэрбитэ, Саха Сиригэр хомсомуоллары тэрийсибитэ. Сэрии кэмигэр 1-кы Украинскай фроҥҥа ыстаап оперативнай бөлөҕөр сибээс аппыһыарынан сулууспалаабыта, пуолка, дивизия хамандыыра кэлин гвардия полковнигын үрдүк аатын ылбыта. Москубаны көмүскүүр кыргыһыыга кыттан, Праганы уҥуордаан, Берлиҥҥэ тиийбитэ.
Икки Кыһыл Сулус уордьанынан, Аҕа дойду сэриитин I уонна II истиэпэннээх уордьанынан, «За оборону Москвы», «За победу над Германией», «За взятие Берлина», «За освобождение Праги» мэтээллэринэн наҕараадаламмыта.
Кыргыһыы хонуутуттан этэҥҥэ эргиллэн кэлэн, научнай үлэнэн дьарыктаммыта, географическай билим хандьыдаата. Московскай уобалас Одинцово куоратыгар 76 сааһыгар диэри уһун олоҕу олорбута.
Оттон орто уол Василий Васильевич туһунан түмэлгэ туох даҕаны дааннай суох. Кыра уол Вениамин Васильевич баара-суоҕа 21 саастааҕар фашистар буулдьаларыттан олоҕу ситэ олорбокко бу дойдуттан барбыта. Кини Антоновка сэлиэнньэтигэр төрөөбүтэ, «Кыһыл Өктөөп» колхуос чилиэнэ этэ. Сэриигэ 1942 с. бэс ыйын 26 күнүгэр ыҥырыллан барбыта, 2-ис Прибалтийскай фроҥҥа сулууспалаабыта. Стрелковай батальон младшай сержана, бууска наводчигын көмөлөһөөччүтэ, разведкалыыр салаа хамандыыра этэ. Аҕа дойду сэриитин уордьанынан наҕараадаламмыта.
Гурий уонна Василий Москубаҕа Кыһыл болуоссакка 1945 с. Кыайыы параадыгар кыттыбыттара, өстөөҕү самнаран, Кыһыл былааҕы күөрэччи тутан, бар дьоҥҥо эйэлээх олоҕу бэлэхтээн, үөрүү-көтүү өрөгөйүн билбиттэрэ.
Хаартыска Ньурба түмэлин пуондатыттан.
-
0
-
0
-
0
-
0
-
0
-
0
