– Бэҕэһээ Опера уонна балет тыйаатырыгар Роман Дмитриев 75 сааһын бэлиэтиир тэрээһиҥҥэ сырыттым. Бирээмэ чаас иннинэ тиийбитим, миэстэ суох буолуо диэн, онтум баар буолан биэрдэ. Үлэ күнэ, бырааһынньык иннинэ буолан дуу. Хата, кэлин элбэх киһи кэлэн зал туолла.
Ил Түмэн Бэрэссэдээтэлэ Алексей Еремеев, Бырабыыталыстыба Бэрэссэдээтэлэ Кирилл Бычков, спортивнай тустуу федерациятын толорооччу дириэктэрэ Роман Гайдуков, тустууктар, олимпийскай чемпионнар Сергей Корнилаев, Ил Түмэн дьокутаата Павел Пинигин, Александр Иванов, спорт миниистирэ Леонид Спиридонов уонна Роман Михайлович огдообото Антонина Софроновна президиумҥа таҕыстылар.
Сүрүн дакылааты Алексей Еремеев оҥордо, туох да кумааҕыта суох бэйэтин тылынан наһаа истиҥник, иһирэхтик тыл эттэ. Итинник тэрээһиҥҥэ сырыттым ини, сылдьыбатым ини, сүрүн тылы, дакылааты кумааҕыта суох эппиттэрин көрө да, истэ да иликпин. Чахчы кыахтаах, өйдөөх, эдэр, кэскиллээх салайааччылаах эбиппит диэн киэн тутуннум. Ол иһин буолуо, кини кэнниттэн тыл эппиттэр шпаргалкаламматылар. Кирилл Бычков туох эрэ кумааҕылаах курдук этэ да, онтун көрбөтө. Итинник таһымнаах салайааччы төрөөбүт тылынан этэр бөҕө буоллаҕа.
Павел Пинигин бэркэ тыл эттэ, мустубут дьон уончата ытыс тыаһынан биһирииллэрин биллэрдилэр. Александр Иванов уу сахалыы тылынан ахтыы оҥордо. Олимпиецтар барахсаттар чугас доҕордоро буоллаҕа. Сүүмэрдэммит хамаандаҕа Роман Михайлович наар дьарык иннинэ политинформация ыытара үһү. Дьэ, урут оннук баара, биһиги үлэбитигэр эмиэ саамай өйдөөхпүт, бэлиитикэ өттүгэр чаҕылхйбыт Чурапчы кыыһа Зинаида Петровна Иванова ыытар этэ. Эчи, нууччалыы да ыраастык саҥарара, өйдөнүмтүөтүк кэпсиирэ кулгаахпар билигин да иһиллэргэ дылы. Чахчы бастыҥтан бастыҥ эрэ, онно үчүгэй бэлэмнээх киһи политинформация оҥорор чиэскэ тиксэрэ. Роман Михайлович Сэбиэскэй Сойуус тустууктарын сүүмэрдэммит хамаандатыгар араас омук уолаттарыттан, чемпионнартан ордор эбит буоллаҕа.
Өссө Александр Николаевич этэринэн, кинини ким да «Роман» диэн ааттаабата үһү, эдэр кыра уҥуохтаах уолу наар ытыктабыллаахтык «Роман Михайлович» дииллэр эбит. Ол чахчы. Урут эмиэ бу тыйаатырга туох эрэ тэрээһин буолбутугар сылдьыбыттаахпын. Онно Роман Михайлович тыл этэ тахсыбытыгар, биллиилээх тустуук, нуучча бухатыыра Иван Ярыгин миэстэтиттэн ойон турбута уонна Роман Михайлович тыл этэн бүтүөр диэри залга соҕотоҕун хороллон турбута. Оо дьэ, кыбыстыах быатыгар ким да, биир да саха турбата ээ. Мин да олордоҕум. Хор, оннук кинини ытыктыыллар эбит. Өссө Александр Николаевич Коркин огдооботун Александра Семеновнаны уонна Роман Михайлович учууталын Екатерина Семеновна Лукинаны туруоран истиҥник махтанна. Ытык кырдьаҕастар турбуттарыгар, бары чиэстээн ытыс таһынныбыт.
Ол кэнниттэн Роман Дмитриев огдообото Антонина Софроновна хараҕа ууланан туран тыл эттэ. Онтон мин наһаа долгуйдум, уйадыйдым, огдооболор бары да итинник буоллахпыт, доҕорбутун сүтэрэн муммут кус оҕолорун курдук сырыттахпыт...
Сыанаҕа маҥан таҥаһы тэлгээн, онно камера штативын ууран премьер Кирилл Бычков уонна режиссер Никита Аржаков илии баттаан баран, тэриэлкэни алдьаттылар. Саҥа киинэни уһуларга бастакы хардыы саҕаланна.
Спорт, тустуу туһунан ырыа бөҕө ылланна. Суруйааччы Арчылан тылларыгар, Луҥха Өлөксөй матыыбыгар "Улуу Баатырбыт" диэн бу түгэҥҥэ анаан айыллыбыт ырыаны Опера уонна балет тыйаатырын солиһа, саха народнай артыыһа Александр Емельянов сөҥ куолаһынан өрө күүрүүлээхтик ыллаан дуораһытта.
Эдьигээн улууһуттан "Чолигда" драмкэлэктиип артыыстара киэн туттар биир дойдулаахтарын, бастакы олимпийскай чөмпүйүөн Роман Дмитриев туһунан испиэктээҕи көрдөрбүттэрэ үөрүүлээх киэһэни олус киэргэттэ. Ол иннигэр олохтон туораабыт суруйааччы Айсен Дойдуну ахтан-санаан сөҥүдүйэн ыллыбыт.
Экраҥҥа Роман Дмитриев олоҕун араас түһүмэхтэрин сырдатар хаартыскалара, видеолара наар көстө турдулар, хайдах эрэ Роман Михайлович биһигини кытта баар курдук санааҕа тиэртэ.
Саҥа тахсыбыт «Мои тетради» диэн кинигэни атыыластым. Антонина Софроновнаны көрсөн, кинигэбэр мусуойга анаан автограф суруйтардым. «Вы же супруга Егора Неймохова, помню», -- диэтэ.
Чэ, итинник, саханы аар саарга аатырдыбыт, ааттаппыт улуу, чулуу киһибит, сулуспут Роман Михайлович Дмитриев төрөөбүтэ 75 сылын өрөспүүбүлүкэ уопсастыбаннаһа үрдүк таһымҥа бэлиэтээтэ.
Мария НЕЙМОХОВА.
2024 сыл, кулун тутар 8 күнэ.
Хаартыскаҕа Мария Васильева (ЯСИА) түһэриилэрэ уонна куйаар ситимиттэн ылылынна
-
0
-
0
-
0
-
0
-
0
-
0
