Сэрии кэмигэр ол оҕонньоттор барахсаттар «Кустук» холкуоска хаппыыста, хортуоппуй, луук, турнепс, эриэппэ үүннэрэн, үрдүк үүнүүнү ылаллара үһү. Кырыымчык кэмҥэ олохтоохторго ол оҕуруот аһа күүс-сэниэ биэрэр битэмиин курдук буолбута мэлдьэҕэ суох. Хаппыысталара, турнепстара, эриэппэлэрэ олус бөдөҥүн билигин 80-чаларыгар тиийбит К.С. Власьева, М.Н. Осипова ахталлар.
Оччотооҕу кэмҥэ оҕурсуну, помидоры сөбүлээн сиэбэттэр эбит, ол иһин тэлиэгэлээх оҕуһунан оройуон киинигэр Үөһээ Бүлүүгэ тиэйэн киллэрэн атыылаан, кыра да буоллар, холкуостарыгар дохуот киллэрэллэрэ. Наһаа көрүүлээҕин иһин, кэлин оҕурсуну, помидоры үүннэрэртэн аккаастаммыттар. Сэбирдэх табаҕы хойукка диэри үүннэрбиттэр.
Анал агроном үөрэҕэ суох Баһылайдаах Махсыым элбэх көрүүнү-истиини көрдүүр үүнээйилэри сэрии кэмигэр аһаҕас халлаан анныгар үүннэрбиттэрин билигин дьон сөҕөр эрэ.
Оҕонньоттор уу кутуутугар обургу оҕолору үлэлэтэллэрэ үһү. Кинилэр сир кырсын алдьатары, күөх үүнээйини тоһутары олох сөбүлээбэттэр эбит. «Үүнээйи эмиэ ыалдьар эттээх, эһиги улахан аньыыны оҥороҕут», -- диэн буойаллара.
Варвара уонна Василий Няниковтар.
Баһылай Няников кэргэнэ Балбаара оҕуруокка сыстан үлэлиирин кэпсииллэр. Киһи сөҕүөн курдук үлэһит эмээхсин үһү. Сарсыарда эрдэ туран, ынахтарын ыан, үүртэлээн, ньирэйдэригэр бугул саҕа оту сүгэн киллэрэригэр, бэйэтэ кыра, ото улахана бэрт буолан, бугул бэйэтэ хааман иһэрин курдук буолара үһү. Сүрдээх аламаҕай, ыалдьытымсах ийэ эбит. Сэрии аас-туор кэмигэр ыалдьыы-сүтүү буоллаҕына, бастакынан кини көмөҕө тиийэрин ахталлар. Ыал ийэтэ ыарыйдаҕына, бэйэтэ төһө да түбүктээх эрээри, хастыы эмэ ыйы быһа сүөһүлэрин, дьиэлэрин көрөрө үһү.
Маннык туруу үлэһит дьон баар буолан, Сэбиэскэй Сойуус алдьархайдаах сэриини кыайбыта.
Алина Яковлева,
V кылаас ,
Ороһу, Үөһээ Бүлүү.
-
0
-
0
-
0
-
0
-
0
-
0
