Судаарыстыбаннай Дуума дьокутааттара маннык быыһык байыаннай кэмҥэ РФ Холуобунай кодексатыгар уларытыылары киллэрдилэр.
352.1 ыстатыйаҕа: «Билиэҥҥэ бэйэ баҕатынан түбэһии» -- 3-13 сылга диэри көҥүлү быһыы;
356.1 ыстатыйаҕа: «Сэрии кэмигэр дьиэни-уоту халааһын» -- 15 сылга диэри хаайыллыахха сөп.
337 ыстатыйаҕа: «Хомуур уонна байыаннай балаһыанньа кэмигэр байыаннай чааһы көҥүлэ суох хаалларыы» -- 5-10 сылга диэри хаайыыга ууруллуу.
332 ыстатыйаҕа: «Бирикээһи толорбот буолуу» -- 2-3 сылга накаастанар.
***
Анал байыаннай эпэрээссийэҕэ баҕа өттүнэн барбыттарга чэпчэтиилэри көрүү туһунан дьокутаат Михаил Матвеев этии киллэрдэ.
“Хантараагынан сулууспалааччылартан кинилэр эрэ букатын социальнай көмүскэлэ суохтар. Бу боппуруоһу Госдума көрөрө оруннаах”, -- диир.
***
АХШ уонна Евросоюз чунуобунньуктара дойдуларын иһигэр баар бэлитиичэскэй балаһыанньаҕа эппиэттиэхтэрэ. Ол курдук, бу дойду гражданнара Украинаҕа буола турар быһыы-майгы туһунан санааларын аһаҕастык, дьэ, этэр буоллулар. Олигархтар уонна нацистар интэриэстэрин туһугар сэрии бэлиитикэтин өйүүртэн аккаастанан эрэллэр.
Бу туһунан Госдума Бэрэссэдээтэлэ Вячеслав Володин: “Украина боппуруоһун эйэлээхтик быһаарыы бэрэсидьиэн Зеленскэйтэн эрэ тутулуктаах”, -- диэн Вашингтон уонна Брюссель этиилэрин кэмэнтээрийдээтэ.
Дьэ, өйдөөтөхтөрө, Зеленскэйи кытары кыайыыны ситиспэттэрин. Оттон хотторуу иһин эппиэтинэс сүгүөхтэрин баҕарбаттара биллэр.
***
Судаарыстыбаннай Дуума ыччат бэлиитикэтигэр кэмитиэтин бэрэссэдээтэлэ Артем Метелев “Анал байыаннай эпэрээссийэҕэ кытта сылдьар устудьуоннарга академическай уоппуска бэриллиэхтээх” диэн этиини киллэрдэ. Маныаха бу дьайыыларга кыттыыны ыла сылдьарын туоһулуур докумуоннар ол ирдэбил испииһэгигэр киириэхтээхтэр.
“Дьиэлэригэр төннүүлэригэр эксээмэннэрин туттарарга кыах баар буолуохтаах, маны тэҥэ үөрэҕин бүтэрэригэр мэктилиэхтээхтэр”, —диэн эттэ.
***
Луганскай уонна Донецкай өрөспүүбүлүкэлэргэ референдумнар түмүктэринэн РФ саҥа сирдэрин-уоттарын докумуоннуурга Судаарыстыбаннай Дуума суһаллык үлэлэһиэ.
Маныаха Крым биһиги састааппытыгар киирбит уопута баар. Хонтуруол кэмитиэтин бэрэссэдээтэлэ Олег Морозов этэринэн, парламент тустаах быһаарыыны бигэргэтэргэ тутатына мустарга бэлэм олорор.
***
Оборона кэмитиэтин бэрэссэдээтэлин солбуйааччы Юрий Швырин ЛНР уонна ДНР, ону тэҥэ Запорожскай, Херсонскай уобаластар Арассыыйа састаабыгар киирэр баҕалаахтара үөрдэрин эттэ.
Кини этэринэн, норуодунай өрөспүүбүлүкэлэр биһиги дойдубут көмүскэлигэр сылдьыахтарын баҕараллара соһуппат. Бу кинилэргэ куттала суох буолууну мэктиэлиир. Оттон дойдубут олохтоохторо маннык быһаарыыга сөпсөһөллөрө чахчы.
Бэрэсидьиэммит Владимир Путин: “Анал байыаннай эппэрээссийэ сыала – Донбасс территориятын босхолооһун”, -- диэн этэр.
-
1
-
0
-
0
-
0
-
0
-
0
