— Убатыллыбыт гааска, уотунан, уунан хааччыйыыга көрүллэр чэпчэтиилээх тарыыптар тустарынан» сокуоҥҥа уларытыылары киллэрэр туһунан сокуон барылыгар иһитиннэриини Сыана бэлиитикэтигэр судаарыстыбаннай кэмитиэт бэрэссэдээтэлэ Антонина Винокурова оҥордо. Сокуон 4.1 чааһын 3-с ыст., 3,1 чааһын 4-с ыст. уларытыыны киллэриигэ төрүөтүнэн оттук-энэргиэтикэ ресурсаларыгар сыана ыараан уонна сүрүннэнэр сыананы ааҕыы методиката уларыйан, 2022-2027 сс. дьоҕус уонна орто биисинэһи өйүүр дьаһаллары таһынан бас билэр хараастаах дьоҥҥо чэпчэтиилээх тарыыптар киллэриллэлэрэ буолбут. Ону таһынан уоту туһаныы ороскуотун сорох чааһын толуйарга федеральнай бүддьүөттэн көрүллэр харчы аҕыйыыра быһаарыллан, 2023 сылтан өрөспүүбүлүкэ бүддьүөтүгэр ноҕурууска улаатар буолбут.
— Онон нэһилиэнньэ уонна тэрилтэлэр оҕустарбаттарын туһугар ОКК (хомунаалынай комплекс тэрилтэтин) субсидиялааһын чэрчитинэн, бүддьүөттэн харчы көрүллэригэр күүскэ үлэлэһиэхпит, – диэтэ Ил Түмэн бүддьүөккэ, үпкэ, нолуок уонна сыана бэлиитикэтигэр, бас билии уонна приватизация боппуруостарыгар сис кэмитиэтин бэрэссэдээтэлэ Юрий Николаев хос иһитиннэриигэ.
Санаа атастаһыытыгар Владимир Богданов Бүлүүтээҕи ГЭС каскаада баарын үрдүнэн таас чоҕунан уонна дизелинэн барар ыстаансыйа билигин да элбэҕин, дьиҥинэн үрдүк күүрүүлээх уот ситиминэн өрөспүүбүлүкэни бүттүүнүн хааччыйар кыах баарын эттэ.
— Анал байыаннай эпэрээссийэнэн сибээстээн, электроэнергияҕа, сылытыыга, оттукка-уматыкка сыананы ыараппакка, «тоҥорор» биитэр намтатар туһунан толкуйдуур сиэрдээх буолуоҕа, – диир норуот дьокутаата.
– Тыл этэр санаам суоҕа да, дакылааччыт хоруйа астыннарбата, – диэтэ бастакы вице-спикер Александр Жирков. – Чугастыы ыллахха, алтынньы 10 күнүгэр илин эҥээртэн кэллим: халлаан сылаас, өрүскэ кыдьымах суох, ол эбэтэр ордук-хос үлэ үөскүү илик кэмигэр паром сыаната саҥа тарыыбынан 1,5 төгүл үрдээбит. Маннык, бытархай курдук эрээри, дьону таарыйар кыһалҕаларга болҕомтону ууруохха наада. Сыана бэлиитикэтигэр судаарыстыбаннай кэмитиэт «ЛГУП инньэ диир, ФАС оннук быһаарар» диэнинэн муҥурданыа, кинилэр ыйыыларынан үлэлиэ суохтаах.
- 0
- 0
- 0
- 0
- 0
- 0