Татарстан Конституционнай суута “О внесении изменений в отдельные федеральные конституционные законы” федеральнай сокуоҥҥа сөп түбэһиннэрэн суох буолла. Бу туһунан Госсовет сокуоҥҥа уонна быраап бэрээдэгэр сис кэмитиэтин бэрэссэдээтэлэ Шакир Ягудин иһитиннэрдэ. Санаттахха, Арассыыйа субъектарыгар Конституционнай сууттары 2023 сыл тохсунньу 1 күнүгэр диэри федеральнай сокуонунан үлэлэрин тохтотуллуохтаах.
Татаардар ылыммыт сокуоннарыгар этиллэринэн, үлэлэрин тохтотор Конституционнай суут судьуйаларыгар нуорма-быраап аакталарынан, материальнай уонна социальнай хааччыллыылара сокуонунан мэктиэлэнэр, оннунан хаалыахтаах. Судьуйалар уопсай төрүөтүнэн биэнсийэни эбэтэр олохторун тухары нолуоктаммат ыйдааҕы төлөбүрү ылар кыахтаналлар. Бу төлөбүрдэр судьуйа хамнаһын 80%-нын ылар.
Шакир Ягудин бэлиэтииринэн, 2023 сылтан ыла Татарстаҥҥа Конституционнай суут мөккүөрэ, итиэннэ судаарыстыбаннай былаас уорганнарын кытары өйдөспөт түгэҥҥэ, Санкт Петербургтааҕы РФ Конституционнай суута сөптөөх быһаарыы ылыныаҕа. Мөккүөр хайдаҕыттан көрөн, Юрисдикция уопсай уонна Татарстан Арбитражнай сууттара эмиэ көрүөхтэрэ. Судаарыстыбаннай сэбиэт спикерэ Фарид Мухаметшин этэринэн, Конституционнай суут үлэтин тохтотор түгэнигэр, сэбиэт иһинэн эбии Конституционнай сэбиэт тэриллиэҕэ. Бу саҥа уорган тэриллэрин туһунан быһаарыы сыл бүтүүтэ эбэтэр эһиилги сыл саҥатыгар ылыллыаҕа.
- 0
- 0
- 0
- 0
- 0
- 0