Пуорум тэрийээччилэрэ – Уһук Илиннээҕи федеральнай уокурукка Арассыыйа Федерациятын Бэрэсидьиэнин боломуочуйалаах бэрэстэбиитэлин аппараата, Арассыыйа Федерациятын Уһук Илини сайыннарыыга министиэристибэтэ, «Социальнай көҕүлээһиннэри сайыннарыы пуондата» кэмиэрчэскэйэ суох тэрилтэ уонна ODBT Group.
Экспертэр «РгоДФО» пуорум чэрчитинэн блогердар уонна интэриниэт контент креативнай экэниэмикэни сайыннарыыга сабыдыалларын дьүүллэстилэр, итиэннэ билиҥҥи чахчылары учуоттаан туран, социальнай ситимнэргэ уонна интэриниэт платформаларга бэйэ ханаалын хайдах сайыннарыахха сөбүн кэпсээтилэр.
Дьокуускайдааҕы INSIGHT PEOPLE продюсерскай киин эрэгийиэннээҕи студиятын салайааччыта Айыына Федорова тэрилтэтин үлэтин туһунан кэпсээтэ. Кини салайар продюсерскай киинэ интэриэһинэй блогердары сайыннарар, дьоҥҥо биллэрэр, кинилэргэ промоушн ыытар. Онуоха Сахабыт сиригэр мөлүйүөҥҥэ тиийэр сурутааччылаах блогердар суохтар эбит. Онон, бастатан туран, дьону тардар контент баар буоллаҕына, сурутааччы элбиир. Продюсерскай киин килийиэннэригэр көмөлөһөрүгэр ону ситиһэ сатыыр. Ону сэргэ Арассыыйа социальнай ситимнэрин тустарынан дьоҥҥо сырдатар үлэ ыытар. «Холобур, билигин «Yappy», «RuTube», «Дзен» диэн платформаларбытын туһанар киһи аҕыйах. Дьон бобуулаах омуктуу ситимнэртэн бэйэбит киэммитигэр көһүөхтээх. Оннук усулуобуйаны хааччыйыахха наада», - диэн эттэ Айыына Федорова.
Видеоконтент саҥа ааптардарын ахсаана эмиэ улаатар. Кинилэр сюжеттарын араас интэриниэт платформаларга уонна социальнай ситимнэргэ таһаараллар. «ВКонтакте» социальнай ситимҥэ киинэ индустриятын кытта үлэ менеджерэ Виктория Борисенко аныгы көрөөччүлэр үрдүк хаачыстыбалаах интэриэһинэй видеоконтеҥҥа харчы төлөөн сурутарга бэлэмнэрин бэлиэтээн эттэ.
Кыттааччылар метавселеннай (биитэр метаверс) диэн өйдөбүлү «Матрица» диэн киинэни көрөн судургутук өйдүөххэ сөбүн эттилэр. «ИТ-генератор» дириэктэрэ Вячеслав Егоров маннык вселеннэйдэр Уһук Илин култууратын эбийиэктэригэр уонна норуотун айымньыларыгар интэриэһи үрдэтиэхтэрин сөп диэн быһаарда. Пуорум метавселеннайдары сайыннарыыга уонна Science Art (билим уонна ускуустуба ыпсыытыгар сылдьар уус-уран айымньылар) треҥҥэ анаммыт панельнай сиэссийэнэн түмүктэннэ.
- 0
- 0
- 0
- 0
- 0
- 0