Дойдубут күнүн бырагыраамата сүрдээх киэҥ ис хоһоонноохтук былааннаммыт. Ол курдук, тэрээһин «Хомусчаан» оҕону сайыннарар кииҥҥэ РСФСР үөрэҕириитин туйгуна, «Учууталлар учууталлара» «Эбии үөрэхтээһин сайдыытыгар кылаатын иһин» бэлиэлэр хаһаайкалара, оҕо уһуйааныгар уһуннук сэбиэдиссэйинэн үлэлээбит А.С. Захарова аатын иҥэрии үөрүүлээх тэрээһинтэн саҕаланна. Манна кыттыыны ыллылар СӨ Ытык сүбэтин бэрэссэдээтэлэ Люлия Николаевна Григорьева, Антонина Семеновна кэргэнэ И.Г. Захаров, уолаттарын дьиэ кэргэттэрэ.
Салгыы “төгүрүк остуол” Арчы дьиэтигэр буолла. Л.Н. Григорьева, улуус баһылыгын бастакы солбуйааччы П.Д. Сазонов, нэһилиэк Сэбиэтин бэрэссэдээтэлинэн, оскуола дириэктэринэн үлэлээбит, СӨ үөрэҕириитин үтүөлээх үлэһитэ П.Г. Морохоев, оскуола дириэктэрэ А.Е. Терентьев, тэрилтэ салайааччылара, биир дойдулаахтарбыт, уопсастыбаннас актыыптара кытыннылар. Нэһилиэкпит инники сайдыытын, туох кыһалҕалааҕын тула кэпсэтии буолла, интэриэһинэй этиилэр киирдилэр.
Ол кэнниттэн спортивнай комплекска тэрээһин үөрүүлээх аһыллыыта буолла. Нэһилиэк баһылыга Евдокия Романовна Гаврильева Хаптаҕай дьаралыгын билиһиннэрдэ уонна саҥа бигэргэтиллибит былаах таһаарылынна, дойдубут өрөгөйүн ырыатын мустубут дьон өрө көтөҕүллэн ыллаата. Бу маннык түгэҥҥэ дьон сомоҕолоһор, төрөөбүт төрүт түөлбэтигэр таптала күүһүрэр, сүгүрүйүү, киэн туттуу санаата олохсуйар.
СӨ Ил Дархана Айсен Сергеевич Николаев эҕэрдэтин, Махтал суругун бырабыыталыстыба сэкирэтэрийээтин салайааччы А.В. Соломонова, улуус грамоталарын улуус баһылыгын э.т. С.С. Потапов бастакы солбуйааччыта П.Д. Сазонов туттардылар.
Биир үөрүүлээх түгэн “Нэһилиэк социальнай-экэнэмиичэскэй сайдыытыгар кылаатын иһин” саҥа бэлиэ олохтоммут. Ону оҕону иитиигэ өҥөтүн иһин С.Ю. Федоровка, тыа хаһаайыстыбатын бэтэрээннэрэ И.П. Алексееваҕа, И.И. Терентьеваҕа, педагогическай үлэ бэтэрээнэ, «Умсулҕан» түмсүү салайааччыта Е.М. Федороваҕа, Хаптаҕайтан төрүттээхтэр түмсүүлэрин салайааччы А.В. Филипповаҕа уонна “Сандаара" ансаамбыл салайааччыта П.А. Давыдоваҕа туттардылар.
Тэрээһин сыала–соруга -- быйылгы үбүлүөйдээх сылга ыһыахтыыр сири, нэһилиэги тупсарыыга аахсыйа ыытыы. Ол чэрчитинэн кэлбит ыалдьыттар үтүөнү баҕаран туран, үбүнэн көмөлөрүн биэрдилэр. Бастакынан куйаар ситиминэн ыҥырыы таһаарбыт Хаптаҕай 8 кылаастаах оскуолатын 1969 сыллаах выпусниктара, дьону көҕүлээн туран, кэмбиэрдэрин уктулар.
Сэрии бэтэрээнэ Семен Петрович уонна уордьаннаах оҕуруотчут Дария Дмитриевна Максимовтар 9 оҕолорун аатарыттан педагогическай үлэ бэтэрээнэ, РФ үөрэҕириитин туйгуна, улахан эдьиийдэрэ Галина Семеновна туттарбыта олус долгутулаах уонна хайҕабыллаах буолла. Салгыы ыалдьыттар, тэрилтэлэр кылааттарын киллэрдилэр.
Дьоро күн Үлэ Геройа, "саха Мичурина" Г.С. Самсонов төрөөбүтэ 100 сылыгар ананан, оҕуруот аһыттан бүлүүдэлэр күрэхтэрэ, норуот маастара А. П. Скрябина үбүлүөйүнэн иискэ, араас оҥоһуктарга маастар-кылаастар, быыстапкалар буоллулар.
Далбар хотуттар уран тарбахтаах иистэнньэҥнэр тикпит араас кэрэ саха таҥаһын кэтэн көрдөрөн, мустубут дьону үөртүлэр, ыһыахха сахалыы таҥас кэтэргэ көҕүлээтилэр.
Бэлиэ күн улахан кэнсиэринэн түмүктэннэ. Кэнсиэр А.Спиридонов-Сайдам «Хаптаҕайтан хааннаахпын хаһан да умнубаппын» хоһоонуттан саҕаламмыта өрө көтөҕүллүүнү, патриоттуу тыыны үөскэттэ.
Бэйэбит кыыспыт, үөрэппит оҕобут, биллэр мелодист, ырыаһыт Анна Барашкова баара буоллар быйыл 55 сааһын туолуо этэ. Кини уостан түспэт ырыалара бу киэһэ ылланнылар.
Бары Хаптаҕайтан төрүттээх, үөрэммит, үлэлээбит үтүө-мааны дьоммут нэһилиэкпит 200 сыллаах үбүлүөйүгэр күүс-көмө, тэрээһиннэр маанылаах ыалдьыттара буолуохтара диэн эрэнэ хаалабыт.
Нина Яковлева,
«Кэскил» оҕо медиа-устуудьуйатын салайааччы.
-
0
-
1
-
0
-
0
-
0
-
0
