Ол курдук 20 устуука инфекцияттан харыстыыр бүтэй көстүүмү, сирэйи хаххалыыр дьэҥкир экраны, атахха кэтиллэр анал бахиланы оҕо консультациятыгар, сэллик балыыһатыгар, уонна инфекционнай балыыһаҕа диэн ааттаан туттарда. Люция Петровна киин балыыһаҕа кылаабынай бухҕаалтырынан оройуон үбүн салаатыгар ыҥырыллан барыар диэри өр кэм устатыгар үлэлээбитэ. Улуус үбүн управлениетыгар казначейство отделыгар начальниктыы сылдьан пенсияҕа тахсыбыта. Билигин кэргэнэ Виталий Петрович тэрийэн хаалларбыт "Бэллэкэ" маҕаһыынын салайан үлэлэтэр. Улуус доруобуйатын харыстабылын бочуоттаах бэтэрээнэ, СӨ үбүн министиэристибэтин «Үп үлэтин туйгуна», Үөһээ Бүлүү нэһилиэгин бочуоттаах олохтооҕо. Аҕата Петр Петрович Петров суһал көмө бастакы суоппардарыттан биирдэстэрэ. Ийэтэ Екатерина Егоровна Лукина балыыһаҕа асчытынан өр кэмҥэ үлэлээбитэ. Балта, Пальмира Петровна, сиэстэрэнэн үлэлии сылдьар, онон балыыһаны кытта быстыспат сибээстээх. Розалия Георгиевна Дмитриеваттан саҕалаан, элбэх кылаабынай бырааһы кытта үлэлээбитэ. Онон да буолуо, балыыһа үлэтин-хамнаһын ис дьиҥин бэйэтинэн билэр. Уһаан-тэнийэн сатыылаабыт араҕан биэрбэт дьаҥ-дьаһах олохпут укулаатын тосту уларытта. Киһи кимэ-туга тургутуллар кэмэ тирээтэ. Бэйэ бэйэҕэ көмөлөсүһүү, өйөбүл-тирэх буолуу хаһааҥҥытааҕар да наада буолла. Онуоха Люция Петровна курдук дьон баар буолан, кыаллыа да суох кыаллар, ситиэ да суох ситэриллэр.
-
0
-
0
-
0
-
0
-
0
-
0
