Ньурба улууhун Күндээдэ дэриэбинэтин чугаhыгар бѳрѳллѳр мэнээктиир уонна сылгыны тардар буолбуттарынан сибээстээн, нэhилиэккэ ыксаллаах быhыы-майгы биллэриллибит. Улуус дьаhалтатын пресс-сулууспата иhитиннэрэринэн, нэhилиэк сиригэр-уотугар 9 сылгыны тарпыттар, аҥара – “Күндээдэ” ААУо, аҥара – чааһынай дьон сылгылара. Олохтоохтор этэллэринэн, Күүкэйинэн, Кутананан, Ньурбачаанынан сылдьар 6-7 төбөлөөх үөр уонна биирдиилээн бөрөлөр бааллар уонна кинилэр ѳссѳ элбэх сылгыны тарпыт буолуохтарын сѳп. Тохсунньуга хапкаанынан бултаан, олохтоох булчуттар: Петр Антонов — Куоҥхаар түбэтигэр Таала диэн сиргэ улахан атыыр бөрөнү, Николай Егоров — Ботомоойуга ийэ бөрөнү бултаабыттар.
Бу сылга киирэн баран, Ньурба улууhун үрдүнэн барыта 7 бѳрѳ бултаммыт: Маалыкайга, Хаҥаласка, Күндээдэҕэ – иккилии, Малдьаҕарга – биир. Бултаммыт биир бөрөҕө улуустан 10 тыһ. солк. төлөнөр, ону таhынан уматыгынан кѳмѳ оңоhуллара былааннанар. Оттон “Сахабулт” самалык тэрилтэтэ “Күндү түүлээҕи тутар киин” ХЭУо 20 тыһ. солк. төлүүр.
Дьон олоҕор уонна доруобуйатыгар куттал үѳскээбитинэн сибээстээн, СѲ экологияҕа министиэристибэтэ Ньурба улууhун Күндээдэ нэhилиэгэр бѳрѳ ахсаанын бэрээдэктиир туhунан тута үс быhаарыыны ылынна.
Сокуон быhыытынан хоромньу оңоhуллубутунан эбэтэр тыа хаhаайыстыбатын кыылларыгар куттал суоhуурунан сибээстээн булт ресурсаларын ахсааннарын бэрээдэктиир туhунан быhаарыылары ылыы усулуобуйалара туоратыллан тураллар. 2023 сыл тохсунньу 1 күнүттэн бѳрѳ ахсаанын бэрээдэктиир сыаллаах бултааhыңңа кѳңүл бэриллибэт. Бѳрѳ ахсаанын бэрээдэктиир туhунан быhаарыы, киhи олоҕор уонна доруобуйатыгар куттал суоhуурун туhунан информация киирдэҕинэ, биир суукка устатыгар ылыллар. Итиэннэ ахсааны бэрээдэктээhин болдьоҕо 3 календарнай күнтэн уhуо суохтаах.
Онон министиэристибэ территориальнай подразделениеларыгар уонна кини салалтатыгар баар тэрилтэлэргэ гражданнартан уонна тыа хаhаайыстыбатын бородууксуйатын оңорон таhаарааччылартан туhааннаах этиилэр киирдэхтэринэ, наадалаах миэрэлэри ылар туhунан ыйыылар ыытылыннылар.
Ону таhынан, биhиги эрэгийиэммит уратыларын учуоттуур туhунан этиилэр Россия айылҕа харыстабылын министиэристибэтигэр ыытыллыбыттар. Билигин «О внесении изменений в приказ Минприроды России от 13 января 2011 г. № 1» бирикээс бырайыага бэлэмнэнэн, сѳбүлэhии стадиятыгар киирбит.
Бѳрѳҕѳ спортивнай уонна любительскай бултааhын кѳңүллэнэр. 2023 сыл тохсунньу 1 күнүттэн улахан бѳрѳ тириитигэр субсидия кээмэйэ — 30 тыh. солк. диэри, бѳрѳ оҕотун тириитигэр — 10 тыh. солк. диэри улаатта. 2023 сылга 15 мѳл. солк. кѳрүллүбүт. Билигин субсидияны ылааччылар талыллаллар, ылааччыны быhаарыы кэнниттэн бѳрѳ тириитин тутуу саҕаланыаҕа.
-
0
-
0
-
0
-
0
-
0
-
0
