Күрэхтэһиини Төҥүлү нэһилиэгин дьаһалтата, “Эйгэ” култуура киинэ уонна Төҥүлү бөһүөлэгин Бочуоттаах гражданина, меценат, попечитель, предприниматель Иван Иванович Борисов тэрийэн, иилээн-саҕалаан, үбүлээн ыыттылар.
Саха сирин араас муннугуттан кэлбит 20-чэ уус 3 күн устата маһы эрбээн, быһан, чочуйан, аалан, кыһан, түөр сиринэн -- сынньалаҥ киинин тэлгэһэтигэр, саҥа үлэҕэ киирбит искибиэргэ, урбаанньыт Иван Борисов балаҕанын таһыгар уонна Тумул нэһилиэгин «НАЛ» кафетын тиэргэнигэр -- уопсайа 19 скульптураны туруордулар. Манна бааллар: ытык салыыр оҕолор, кустаах саһыл доҕордоспута, Хатан Тэмиэрийэ, хомпоруун хотой, саһыл муннугар кустар олорбуттара, кыталыктары көрөр кыыс, эһэ Миисэ, ойуун кыырара, о.д.а.
Уустар бэйэлэрэ: “Мас инчэҕэй буолан, сирэйдэрэ-харахтара соччо үчүгэйдик табыллыбата”, -- дэһэллэр да, биһиги көннөрү дьон көрүүбүтүгэр туох да ааттаах оҥоһуктар.
Түмүккэ бастакы миэстэни "Бырдьа Бытык Хатан Тэмиэрийэ" диэн үлэтинэн Нам улууһун ууһа Василий Аргунов ылла уонна 50 тыһыынча солкуобайы уу харчынан тутта.
Иккис миэстэ -- Иван Мохначевскай (Мэҥэ Хаҥалас), “Хопто ырыата” оҥоһугунан. Бирииһэ -- 40 тыһыынча солк.
Леонид Афанасьев (Үөһээ Бүлүү) “Эбээ күөрчэҕинэн” үһүстээтэ, 30 тыһ. солкуобайы ылла.
Хас биирдии кыттааччыны Иван Борисов 10-нуу тыһыынчанан бириэмийэлээн үөртэ.
“Алаа Хотой Кыһыл аттаах Алтан бухатыыр” дьүһүйүүтүнэн Бүлүүттэн Николай Степанов “Дархан Уус” анал аат хаһаайынынан буолла. “Кэскиллээх мас ууһа” анал ааты үс эдэр ууска биэрдилэр: “Суор ойууну” оҥорбут Тимур Кынатовка (Таатта), “Эр киһи харысхала” үлэтинэн Мэҥэ Хаҥаластан Борис Шариҥҥа уонна Амматтан Данил Тимофеевка («Балык тойоно – Күөх Боллох”).
Куонкурус үлэлэрэ аны мантан ыла Төҥүлү киэҥ туонатын, Тумулунан тэнийэр алааһын киэргэтиэхтэрэ.
- 0
- 0
- 0
- 0
- 0
- 0