Күөллэр муустара туран, тыа дьоно муҥха кэмин кэтэһэ сылдьыбыт буолуохтаахтар. Ол эрээри, коронавирус ыарыы тарҕаныытын аччатар сыалтан кэккэ улуустар,Чурапчы, Мэҥэ Хаҥалас, Амма, Нам, Үөһээ Бүлүү улуустарыгар маассабай муҥхалааһыны боппуттар. Холобур, Мэҥэ Хаҥалас Сымах сэлиэнньэтигэр сылын аайы 300-кэ киһи муҥхаҕа кыттара. Быйыл бу нэһилиэккэ муҥханы боптулар. Амма баһылыга Николай Архипов нэһилиэктэрэ аҕыйахтыы эрэ буолан күөллэргэ киирэри көҥүллээбит. Нам улууһун Таастаах сэлиэнньэтин баһылыга Егор Панкратьев нэһилиэгэр муҥханы ыытартан аккаастаммыт.
Оттон сорох нэһилиэктэргэ муҥха хайыы-сах ыытыллан, дьон үөрэ-көтө балыктыы сылдьар. СИА иһитиннэрбитинэн, Үөһээ Бүлүү улууһун Далырын олохтоохторо бэҕэһээ Тараҕай оттооҕо күөллэригэр бастакы муҥхаларын түһэрбиттэр.
Далыр нэһилиэгэр бэҕэһээ Тараҕай күөлүгэр бастакы муҥха буолла. Нэһилиэк баһылыга Георгий Иванов иһитиннэрбитинэн, улуустааҕы суһал штаб муҥхалааһыҥҥа бобуу суоҕун биллэрбит.
— Нэһилиэккэ 978 киһи олорор. Улуус кииниттэн 65 км тэйиччибит. Билигин Бүлүү эбэ хаайар, суол суох. Сахалыы толкуйунан, кыһыҥҥы хаһаас аһы булунарга муҥха куруук тэриллэр. Муҥха ыытыллыытын тутулунан манна «контактаһыы» суох, нырыыһыттар бэйэ-бэйэлэриттэн тэйиччи сылдьыллар. Арай айаҥҥа уонна чэйдииргэ эрэ сэрэхтээх буолуон сөп, онон массыынаҕа хайаан да мааска кэтэри уонна бэйэ эрэ аһын илдьэ кэлэн чэйдээһини тэрийбиппит. Итиэннэ атын сиртэн кэлии киһи суох буолуохтаах. Барыта 36 киһи кытынна, оҕолор суохтар, — диэбит..
- 0
- 0
- 0
- 0
- 0
- 0