Хата, от кэмин үгэнэ бара турар. “Сүөһү ииттэр хаһаайыстыбалар ааспыт икки сылга киин улуустартан уонна улуус иһиттэн от атыыласпыт эбит буоллахтарына, быйыл оту аҕалтарбаппыт. Киин улуустар курааннааннар от сүгүн үүммэтэ. Бүгүҥҥү туругунан улууска 612-тэн тахса отчут ходуһаҕа тахсан турар. Ааспыт сылга от былаана 10 тыһ. туонна этэ. Быйылгы былаан – 8 685 туонна” диэн кэпсиир Үөһээ Дьааҥы улууһугар тыа хаһаайыстыбатын начаалынньыгын солбуйааччы Евдокия Слепцова.
Киин улуустарга балаһыанньа уустук. Кэлиҥҥи сылларга оттооһуҥҥа ыарахан дьыллар үүннүлэр. Кураан турбута хаһыс да сыла. Сыл аайы ардаҕы кэтэһэн-манаһан биэрэбит да, айылҕа быйаҥыттан бэрсэр гына өлгөмнүк тоҕо куппат. Аны туран ойуур баһаардара сири-сибиири бараан туспа кыһалҕаны-кутталы үөскэттилэр. Онно эбиитин илин эҥээр улуустарын аһыҥа булаабыта, отчуттары кытта тэҥҥэ “оттуспута” эмиэ хаһыс да сыла.
Быйыл төһө от оттоноро былааннанарый?
Тыа хаһаайыстыбатын министиэристибэтэ быйыл төһө от оттонуохтааҕын былаан оҥорон түһэрбитэ. Министиэристибэ дааннайынан, өрөспүүбүлүкэ үрдүнэн быйыл уопсайа 231117 ынах-сүөһүнү, 228087 сылгыны кыстыкка киллэрэргэ былаанныыллар.
Уопсайа холбоон 450-ча тыһыынча сүөһүнү, сылгыны кыстатарга быйыл сайын 474 482 туонна от, 26 867 туонна сенаж уонна 14 766 туонна сиилэс бэлэмнэниэхтээх.
Саамай элбэх былааны, биллэн турар, элбэх хаһаайыстыбалаах улахан улуустарга түһэрбиттэр. Холобур, Мэҥэ хаҥаластар 42 698 туонна, сунтаардар 39 135 туонна, таатталар 35 656 туонна оту оттуохтаахтар. Кинилэр кэннилэриттэн чурапчылар – 34 478 туонна, ньурбалар – 33 359 туонна, уус алданнар – 38 805 туонна кэлэллэр.
Хотуларга, биллэн турар, былаан кыра. Арыый да добуоччу былаан дьааҥыларга (8 686 т.), орто халымаларга (5 571 т.), өймөкөөннөргө (2 324 т.) түһэн турар. От былаана түспэтэх, оттообот Саха сирин үрдүнэн биир улуус баар. Ол – Анаабыр улууһа.
Хаартыскаҕа: Үөһээ Дьааҥы улууһун Боруулаах орто агрооскуолатын үөрэнээччилэрэ -- от үлэтигэр
-
0
-
0
-
0
-
0
-
0
-
0
