Вячеслав Федорович оттооһун туһунан нэһилиэгин олохтоохторугар санаатын аһаҕастык этэрин видеонан көрүҥ, истиҥ.
Адьас сөпкө этэр, оту төһө кыалларынан оттуохха наада. Оннук оттуурга бары усулуобуйа барыта баар. Кыстыкка хайдах бэлэмнээх киирэрбит, чахчы, бэйэбититтэн тутулуктаах. Онон кытаатыаҕыҥ! "Сүөһүм-аһым суох" диэн олорбокко, бары оттуур кыахтаах дьон оттуоҕуҥ. Бу кыстыкка аҕыйах да бугул көмүс сыаналаныа турар. Атыылаһар оппут сыаната туоннатыгар 6000 диэн буолан турар, оттон ити сыана оннунан хаалыа диэн ким да мэктиэлээбэт, 10 тыһыынчаҕа тиийэ тахсыан сөп...
Агрегат тиэхиньикэ, дьон-сэргэ оттообот хонноҕо-быттыга, уулаах сирдэрбит үтүмэннээх элбэх. Лаҥха, дулҕа буолбут сирдэрбит эмиэ аҕыйаҕа суохтар. Кытаатыаҕыҥ, орто туруу бараан дойдуга кыһалҕа киһи кыаҕын иһинэн бэриллэр куолута, “от суох” диэн ытыспытын нэлэс, санныбытын ыгдах гыннаран баран сырыттахпытына, ким да биһиэхэ биир салаа оту куду анньан кулуо суоҕа. Бэйэбит санаабыт күүһүгэр, чэрдээх илиибитигэр, аймах, атас өйөбүлүгэр эрэннэхпитинэ, тирэҕирдэхпитинэ оттонуохпут-мастаныахпыт.
Дьонум-сэргэм барахсаттар! Былыр-былыргыттан үлэни өрө туппут, араас үтүмэн кыһалҕалары эҥээрбитинэн кэһэн туораабыт, биирдэ да санааны түһэрэн мунчааран көрбөтөх бүгүрү үлэһит дьон буолабыт, онон олуһун киэн туттабыт, өрүү күөн туттабын. Зоотехническай нуорманан, холобур, биһиги нэһилиэкпит сиригэр хайдахтаах да сылларга 3500 ынах сүөһүнү уонна 1500 сылгыны иитиэхпитин сөп. Мантан антах дулҕаҕа, талахха ылларбыт ходуһа сирдэрбитин чөлүгэр түһэриигэ былааннаах үлэлэр ыытыллан, ходуһабыт сирин иэнин кэҥэтиигэ улахан соруктар тураллар. Уонна бары күүһү түмэн, баҕа санаа быһыытынан уопсай чэрдийэ күрүөлэрин хаттаан сөргүтэр киһи бэрт буолуох этэ. Өбүгэлэрбит күрүөлээх сири ампаардаах аска холууллара.
Таатта улууһун Дьохсоҕон нэһилиэгин баһылыга Петр Захаров.
-
0
-
0
-
0
-
0
-
0
-
0
