Горнай улууһун баһылыга Никита Андреев бу туһунан иһитиннээрилээх нэһилиэнньэҕэ таҕыста.
Арассыыйа “МЧС” министиэристибэтин пресс-сулууспата иһитиннэрбитинэн, билигин Бэс Күөлгэ уоту утары үлэҕэ 15 тиэхиньикэ, 200-чэ киһи үлэлии сылдьар. Ол "МЧС", “Якутлесресурс”, “Авиалесоохрана”, баһаары утары сулууспа үлэһиттэрэ. Тыал олус күүһүрбүтүттэн дьиксинэн бэҕэһээ олохтоохтору көһөртөөбүттэр. Хаалбыт дьону бүгүн салгыы эвакуациялыы олороллор. Бэс Күөлүн баһаарын утары бэҕэһээ 105 киһи састааптаах Хабаровскайдааҕы байыаннай чаас инженернэй этэрээтэ үлэтин саҕалаабыта.
Видео-устууларга “гарааспыт умайан эрэр, саатар дьиэни быыһаабыт киһи”, “дьэ, ыксал буолла! Уот үөһэнэн көтөн киирдэ. Хас да дьиэ умайда”, “Таҥара да көмөлөспөт буолла быһыылаах”, “уоппут бу кытаран аҕай иһэр” диэн олохтоохтор аймаммыт саҥалара иһиллэр. Киһи тумнастар буруотун быыһыгар, кытыаста турар уот ортотугар дьиэлэрин, тутууларын быыһыы сылдьаллар. Киһи үйэтин тухары оҥостуммут, тэриммит дьиэтин хайдах көрдөрөн туран уокка былдьатыай?.. Сэниэ, күүс-уох, кыах төһө тиийэринэн туруулаһа сатыахтара турдаҕа.
Ил Дархан сорудаҕынан үөһэттэн уу кутар бөртөлүөт көттө. Айсен Николаев бэйэтэ эмиэ Бэс Күөлгэ айаннаата.
Аны туран “уу кутар Ми-8 бөртөлүөт Кэбээйи Сангаарыгар үлэлии барар” диэн иһитиннэрии кэллэ. Манна эмиэ тыал күүһүрэн, уот бөһүөлэккэ киирээри ыксаллаах быһыыны-майгыны үөскэппит. “РСЧС” Дьокуускайдааҕы салаата иһитиннэрбитинэн, билигин Сангаар уотун утары 40-ча киһи, 6 тиэхиньикэҕэ үлэлии сылдьар. Санатан эттэххэ, иккис Ми-8 бөртөлүөт Таатта Ытык Күөлүгэр үлэлиир.
-
0
-
0
-
0
-
0
-
0
-
0
