Чурапчы улууһун Кытаанах нэһилиэгэр олохтоохторо Прасковья Алексеевна уонна Николай Васильевич Пономаревтар 14 оҕолоохтор. Кинилэр уолаттара тохсуон тыа сиригэр тыын суолталаах суоппар уонна тырахтарыыс идэтин ылбыттара туһугар биирдэ көстөр түгэн буолуохтаах.
Маны таһынан, кыыстара Евдокия Николаевна Ноева, 13 сыл ыстаастаах суоппар, Ыраах айан суоппардарын I сийиэһин кыттыылааҕа, Саха Өрөспүүбүлүкэтин автомобильнай тырааныспарын Бочуоттаах үлэһитэ. Онон бу биир ыалтан тиэхиньикэ эйгэлээх 10 ыччат иитиллибит.
Саамай улахан уол Николай Николаевич I -- чемпион-суоппар, Саха Өрөспүүбүлүкэтин автомобильнай тырааныспарын үтүөлээх үлэһитэ, Саха Өрөспүүбүлүкэтин автомобильнай тырааныспарын Бочуоттаах үлэһитэ, 49-с сылын уруултан илиитин араарбакка үлэлии сылдьар.
Иккис уол Алексей Николаевич «ДТ-76», «К-700» тыраахтардарга үлэлээбитэ, Василий Николаевич «ЗИЛ», «КамАЗ», «Урал» массыыналары тэһииннээн ыраах айаҥҥа сылдьыбыта, Иван Николаевич Саха Өрөспүүбүлүкэтин автомобильнай тырааныспарын Бочуоттаах үлэһитэ, күн бүгүн да илиитин тыраахтарын уруулуттан араабакка үлэлиир, Андрей Николаевич тутуу, лесхоз уонна суолу оҥорор тэрилтэлэргэ үлэлээбитэ, оттон Николай Николаевич II, Георгий Николаевич, Пахом Николаевич ааспыт сылларга бастыҥ мэхэньисээтэрдэрэ, суоппардара. Михаил Николаевич нэһилиэккэ бастакынан такси өҥөтүн киллэрбитэ.
Дьэ бу курдук тоҕус ини-бии уолаттар тохсуон тыа хаһаайыстыбатын бары тиэхиньикэтин уонна аарас мааркалаах массыыналарын дэгиттэр баһылаабыт суоппардар, мэхэньисээтэрдэр, уруултан илиилэрин араарбакка, сороҕор өрөбүлэ суох, массыыналарын, тыраахтардарын оҕолорун курдук көрөн-истэн, өр сылларга үтүө суобастаахтык, таһаарыылаахтык үлэлээбиттэрэ. Төрөөбүт нэһилиэктэрин, улуустарын сайдыытыгар бэйэлэрин кырата суох кылааттарын киллэрбиттэрэ. Үлэни өрө туппут Пономаревтар олохторун күн бүгүн сиэннэрэ салҕыыллар, удьуор утума салҕанар.
Лена ПОНОМАРЕВА, Чурапчы, Кытаанах.
-
0
-
0
-
0
-
0
-
0
-
0
