Дуона суохтан да долгуйа, бэрт кыраттан да бэркиһии, сүүтүк саҕаттан сөҕө тэтиҥ мас үһү дии-дии үрүбүнэйэр, ини дии-дии илибириир. Халыҥ тыа хаххата, аар тайҕа абырала кыраҕа ымыттыбат, оччугуйга омуннурбат тиит мас тиҥ курдук чиҥ, эрэҥкэдийбэт, элэс-мэлэс буолбат, иэдэс биэрбэт, куруутун дьоһун, мэлдьи эрэллээх. Ыраас, чэбэр бэс чагда салгынныын чэпчэки, дьэҥкэ, чопчу. Үрэҕи батыһа, биэрэги кыйа ыһыктыбаттыы ылсыбыт, сөллүбэттии иилсибит иирэ талах иирсээҥҥэ киирсибэт, мөккүөргэ-моргуорга кыттыспат.
Кини куруутун иһиллиирдээх,эргиччи сэргиирдээх. Кыыһа буспут кыһыл хаптаҕаһы хараарчы көрбүт дьордьума солбуйда, чараас чараастык көҕөрчү көрбүт сугун сэрэниин сэрэнэн манна баарбын ээ диэн сибигинэйдэ. Сааскы күн сардаҥатын мүлчү туппатахтар,кэмигэр буору булларбыттарыттан, биэдэрэнэн хомуйдулар,туустаан-тумалаан тупсаран,оттоон-мастаан амтаннаан бааҕынан хаһааннылар, бааҥкалаан бачыгыраттылар, истикилээҥкэлээн кэчигирэттилэр.
Кэбиһиилээх отун кэккэлэппит, урулуоннаах оту ууруммут, куруламмыт отун сурунна, тиэммит отун ааҕынна. Тыаҕа сылдьааччы, быйаҥы сомсооччу айылҕаттан ылары эрэ санаама, баһымах санааҕа баһыйтарыма, сөп буоларгынан көрөн хомуй, сэмэйдик, чэбэрдик сырыт.
Астаах-үөллээх, дэлэй-холой атырдьах ыйа ортолотто, сарсыадата күһүҥҥү тыыннаах, күнүскүтэ сайыҥҥылыы сымнаҕас, сылаас, киэһээҥҥитэ харах симсэр хараҥа.
Хаартыска: https://www.google.com/url?sa=i&url=https%3A%2F%2Fkirill-kvs.livejournal.com%2F22042.html&psig=AOvVaw3ssLMduX1bIZj0S5BzTXAi&ust=1724287737387000&source=images&cd=vfe&opi=89978449&ved=0CAMQjB1qFwoTCKDU3MXuhIgDFQAAAAAdAAAAABAv
-
0
-
0
-
0
-
0
-
0
-
0
