Барааччы-кэлээччи сири-дойдуну кэрийдэ, кэрэттэн бэйэтэ кэрэтийдэ, үтүөттэн үтүмэн үөрүүнү биллэ, сэргэхсийдэ, сэгэччи буолла. Айылҕа барахсан күнүн аайы ааҕан-суоттаан турдахпыт аайы туох эрэ саҥаны-сонуну бэлэмниир, бииртэн биири тылыннарар, ситэрэр - хоторор, буһарар, кытара кыыспыты, күп күөҕүнэн көрбүтү, хараарчы сиппити бэлэх-туһах оҥорор, оҥоойугу толорор, биэдэрэнэн бэрсэр, солуурунан сомсор.
Дууһа, сүрэх уоскулаҥар баҕарбыкка иһиллээбит курдук иһийбит, чуумпу муннуктарыгар ыҥырар, билиэн-көрүөн баҕарбыкка тиитин төрдүн, хатыҥын аннын аайы сэбирдэҕин, иннэтин, отун-маһын анныгар, хонноҕун анныгар кистэлэҥнэрин арыйар, ити диэкиттэн дьирики дьигиҥниир, бу диэкиттэн көтөр тахсан кэлэр, элгээн, чүөмпэ аайы итии сиргэ барыахтаах кус-хаас улааппыт оҕолорун субурутан таһааран аһатар-сиэтэр, көтөргө үөрэтэр, чугас сирдэринэн чуҥнаан, бэттэх сирдэринэн биэтэҥнээн сыыйа-баайа киэҥ куйаар киэлитигэр таһаарар, бииргэ буолар, үөрүнэн сылдьар үтүөтүн биллэрэр, ойдон, быстан хаалбакка соломо да саҕаттан тутуһан сылдьар ордугун долоҕойго түһэрэр.
Биһиги эмиэ бииргэ буолуоҕуҥ, тутуспутунан сылдьыаҕыҥ!
-
0
-
0
-
0
-
0
-
0
-
0
