Арассыыйа эбээннэрин VI сийиэһигэр Магадаан, Сахалин уобаластарыттан, Камчатка уонна Хабаровскай кыраайдарыттан, Чукотскай аптаныамынай уокуруктан дэлэгээттэр кытыннылар.
Сийиэс Арассыыйа биэс эрэгийиэнин салайааччыларын уонна Хотугу сир, Сибиир уонна Уһук Илин төрүт олохтоохторун ассоциациятын өйөбүлүнэн ыытылынна.
Дойду эбээннэрин сийиэһин Саха Өрөспүүбүлүкэтин Ил Дархана Айсен Николаев бэйэтин эҕэрдэтинэн көрүстэ, хотугу төрүт олохтоох аҕыйах ахсааннах омуктар култуураларын, төрүт дьарыктарын харыстааһыҥҥа эрэгийиэн өртүттэн туох үлэ ыытылларын бэлиэтээтэ.
Саха Өрөспүүбүлүкэтин норуот дьокутааттара эмиэ көхтөөхтүк кыттан, бэйэлэрин санааларын, төрүт олохтоох норуоттары сокуонунан харыстааһыҥҥа туһуламмыт үлэни, былааннары билиһиннэрдилэр.
РФ сэнээтэрэ Сахамин Афанасьев быйыл Арассыыйа Хоту, Сибиир уонна Уһук Илиҥҥи төрүт норуоттарын кэлим сайдыытын кэнсиэпсийэтэ оҥоһуллан, 2025 сылга ылыллыахтааҕын иһитиннэрдэ. “Төрүт олохтоохтор олоххо туттар туһалаах өрүттэргэ үлэлэһиигэ болҕомтону уурарга туһаайаллар. Табаһыттарга буран көлө, балыксыттарга мотуордаах оҥочо уонна тэрил, булчуттарга спутниковай сибээс наадалар. Онон култуураны уонна да атын социальнай өрүттэри харыстааһыҥҥа ордук болҕомто ууруллубут буоллаҕына, бырабыыталыстыба стратегическай былааннааһын докумуоннарыгар бу өрүттэри учуоттуура буоллар. Ону тэҥэ, билигин саамай сытыы боппуруостарынан төрүт олохтоох омуктар чөл олохтоох буолуулара уонна сир учаастагын туһанар бырааптарын олоххо киллэриилэрэ буолаллар. Аныгы усулуобуйаҕа биисинэскэ үлэлэһии, интэриниэт нөҥүө информационнай уонна телекоммуникационнай ситимнэри баһылааһын туһунан боппуруостары быһаарыы соруга турар», — диэн бэлиэтээтэ сэнээтэр. Сахамин Афанасьев сийиэс кыттыылаахтарын бу Кэнсиэпсийэ бырайыагын дьүүллэһиигэ көхтөөхтүк кытталларыгар, этиилэрин киллэрэллэригэр ыҥырда.
Норуот дьокутаата, Ил Түмэн Хоту дойду төрүт олохтохтоох аҕыйах ахсааннаах норуоттарын боппуруостарыгар уонна Аартыка дьыалаларыгар сис кэмитиэтин бэрэссэдээтэлэ Елена Голомарева бэйэтин этиитигэр Хотугу олохтоох омуктар олохторун төрдүн быһыытынан таба иитиитигэр болҕомтону уурууга туһаайда. Өрөспүүбүлүкэҕэ таба иитэр хаһаайыстыбаларыгар 2023 сыл түмүгүнэн 170 тыһыынчаттан тахса дьиэ табата баар. Кини таба иитиитин юридическэй статуһа анал федеральнай сокуонунан быһаарылла илик диэн долгуйарын биллэрдэ. Итиннэ олоҕуран, табаһыт ороскуота үрдээбитин толуйуу, көһө сылдьар дьиэ тутуута уонна көрүүтэ-истиитэ, ону тиэйиигэ тырааныспардаах буолуу, оттугунан хааччыйыы, көһө сылдьар дьон аһылыгын уо.д.а. суолталаах боппуруостарга тохтоото.
СӨ Тыа хаһаайыстбатын министиэристибэтигэр ыытыллыбыт “төгүрүк остуолга” РФ Госдууматын дьокутаата Петр Аммосов сийиэс дэлээгээттэрэ бэйэлэрин эрэгийиэннэрин салалталарыгар тахсан бөрөнү бултааһыҥҥа баар хааччахтааһыны тохтоторго туруорсарга ыҥырда. Ол курдук, кини Госдуума бэрэссэдээтэлэ Вячеслав Володины кытта көрсүһүүтүгэр бу этиини сүнньүнэн өйүүрүн биллэрбитин санатта. Маны таһынан, сийиэскэ СӨ Аартыка сайдыытын уонна хотугу норуоттар дьыалаларын миниистирин солбуйааччы Михаил Погодаев, Камчаткатааҕы аҕыйах ахсааннаах норуоттар бырааптарын көмүскээччи боломуочунай Роза Долган, Магадаан, Чукуотка, Хабаровскай кыраай эбээннэрин кытта үлэлэрин туһунан дэлэгээттэр уопуттарын атастастылар.
Манна диэн бэлиэтээтэххэ, Арассыыйа эбээннэрин Ассоциациятын Бэрэсидьиэнинэн Анатолий Николаевич Слепцов талылынна. Кини М.К. Аммосов аатынан ХИФУ каапыдыратын сэбиэдиссэйэ, Аартыка боппуруостарыгар биллиилээх учуонай. Бырабылыанньа састаабыгар 14 киһи киирдэ. Аныгыскы уочараттаах сийиэһи 2029 сыл кулун тутарыгар Чукуоткатааҕы аптаныамынай уокурук Билибинскэй оройуонугар ыытарга быһаардылар.
Хаартыскалар Ил Түмэн пресс-сулууспатын, Илкэн саайтарыттан
-
0
-
0
-
0
-
0
-
0
-
0
