Түһүлгэ

Оҕону сахалыы ааҕа үөрэтэргэ

Күнү супту суотабай төлөпүөнтэн илиитин араарбат уончалаах оҕону сахалыы кинигэни ааҕа, төрүт тылбытынан толкуйдуу үөрэтэргэ, кини интэриэһин тардарга ааптар Ангелина Васильева – Дайыына фэнтези жанрынан «Аптаах таас» диэн сэһэн кинигэтэ таҕыста.  Кинигэ сүрэхтэниитэ бэҕэһээ, ахсынньы 18 күнүгэр Бэчээт дьиэтин Медиакиинигэр буолан ааста. 

Ангелина Васильева саха литературатыгар аан бастаан бэйиэт быһыытынан киирбитэ, онтон прозаҕа көһөн, кэпсээннэри суруйбута, билигин оҕо айымньытыгар ылыста. СГУ суруналыыстыка салаатын бүтэриэҕиттэн «Саха Сирэ» хаһыакка социальнай боппуруостары дириҥник ырытан, анааран айымньылаахтык үлэлии сылдьар уопуттаах, ураты буочардаах суруналыыс. 

Оҕону алыптаах дойдуга сиэтэн киллэрэр фэнтези сэһэн сир анныгар олорор тииҥ курдук дьоннор бааллар диэн үһүйээҥҥэ олоҕуран сурулунна. Күн сырдыга тиийбэт ыас хараҥа сиргэ таастар эрэ күлүмүрдээн көстөллөр. Айымньыга оҕолор сүппүт аптаах тааһы көрдүү киһи харахтаан көрбөтөх тыынар тыыннаахтарын куораттарыгар олох атын эйгэҕэ тиийэн, араас мүлчүргэннээх сырыыга түбэһэллэр, урукку олохторугар кытта үктэнэллэр.

«Дьокуускай куорат дьалхааннаах түөлбэтигэр сорох аныгы оҕолор сахалыы ааҕыахтааҕар сатаан да саҥарбаттар, ону биһиги кинилэри буруйдаабакка ааҕарга, санааны сайа этэргэ көҕүлүөхтээхпит, онуоха төрөппүттэр, саха тылын учууталлара бииргэ үлэлэһиэхтээхтэр.  

Биллэн турар, оҕо интэриэһин табыахха наада. Кини сөбүлээн ааҕар айымньылара баар буоллахтарына, салгыы кинигэни утаппыттыы ааҕыахтара. Оскуола оҕолорун кытта кэпсэтэн көрдөххө, фэнтезины сөбүлүүллэр эбит. Алыптаах айымньы атын дойдуга сиэтэн илдьэн сырытыннарар, оҕо оҥорон көрөр дьоҕурун сайыннарар.

Оҕолор кинигэни ааҕан баран иккис чааһын суруй диэтилэр. Тэттик кэпсээннэртэн турар сэһэн доҕордуу сыһыаны харыстыырга, бэйэ-бэйэҕэ эрэллээх буоларга, ыксаллаах түгэҥҥэ доҕоргун быраҕан барбакка, күүс-көмө буоларга үөрэтэр», — диэн билиһиннэрдэ ааптар.

Кинигэ күн сирин хайдах көрбүтүн кылгастык кэпсээтэххэ, былырыын «Алта» кинигэ кыһата көҕүлээһининэн уонна урбаанньыт, меценат Руслан Федотов үбүлээһининэн оҕолорго проза айымньытын суруйуу литературнай куонкуруһа биллэриллибитэ.

Күрэххэ барыта холбоон 20 тахса киһи кыттыбыта, дьүүллүүр сүбэ кэҥэтиллибит синопсиһы ааҕан баран бастыҥ үлэлээх ааптарга «Айыы кыһатын» оскуолатын выпускницатыгар, билигин Санкт-Петербург куоракка үөрэнэр 20 саастаах Валерия Потаповаҕа 500 тыһ. солк. бириэмийэни туттарбыта.

«Күрэҕи биир эрэ айымньынан түмүктээн кэбиһиэхпитин баҕарбатахпыт. Түөрт интэриэһинэй ис хоһоонноох айымньылары талан, «Офсет» хампаанньа өйөбүлүнэн таһаарарга сөбүлэһиигэ илии баттаспыппыт. Онно биир бастыҥнарынан Ангелина Васильева  «Аптаах таас» диэн кинигэтэ буолбута уонна биэс тахсыахтаах кинигэлэртэн бастакынан таҕыста. Куоракка элбэх кинигэ кыһата баар эрээри, оҕоҕо аналлаах айымньылар күн аайы тахсыбаттар, онон бу салааҕа саҥа сүүрээни киллэриэхпит диэн бүччүм санаалаахпыт», — диэтэ Арассыыйа суруйааччыларын сойууһун чилиэнэ, «Алта» кинигэ кыһатын салайааччыта Зинаида Архипова.

Кинигэ тирааһын элбэтэргэ этии киирдэ  

Айымньы сүрэхтэниитигэр кэлбит «Айыы кыһатын» 6а, 5в кылааһын үөрэнээччилэрэ санааларын үллэһиннилэр. Кинилэр «Гарри Поттер» курдук фэнтези сөбүлүүллэрин, сахалыы кинигэ сүрүн геройдары сэргээбиттэрин, олохторун өссө кэҥэтэн ойуулуур наадалааҕын туһунан эттилэр.

Оҕолор «Аптаах таас» кинигэ ойуута табыллыбытын, сэһэн сюжета өйдөнөрүн, иккис чааһын күүтэллэрин туһунан иһитиннэрдилэр. Сэһэн 200 ахсааннаах тираһынан тахсыбыта кыратын, элбэх оҕо ааҕарын туһугар 2000 кинигэни бэчээттээн таһаарарга этии киллэрдилэр.

Бу судаарыстыбаннай бырагырааманан өйөммөтөх, сүрэх баҕатынан «Офсетка» кыра тирааһынан тахсыбыт бырайыак ааҕааччы сэҥээриитин ыллаҕына, салгыы кэҥээн-тэнийэн иһиэ диэн эрэниэххэ сөп.

Саха Сирин суруйааччыларын сойууһун бэрэссэдээтэлэ, бэйиэт, публицист Гаврил Андросов саха литературатыгар оҕо айымньыта күлүккэ түһэн турар кэмигэр «Аптаах таас» алыптаах-хомуһуннаах эйгэҕэ киллэрэн, бу салааны сайыннарарга олук уурарын бэлиэтээтэ.

Аа-дьуо сылдьан эрэ оҥорон кэбиһэр

«Саха Сирэ» хаһыат сүрүн эрэдээктэрэ Александр Тарасов бу кинигэ тахсыбытын соһуйа истибитин туһунан эттэ.

Ангелина аа-дьуо сылдьан эрэ барытын оҥорон кэбиһэриттэн, сыл бүтүүтэ кинигэ суруйан элээрдэн таһаарбытыттан сөхпүтүн биллэрдэ. Билигин сахалыы фантастика кинигэтэ суох кэмигэр бу салааҕа бэйэтин суолун-ииһин булан, салгыы сэһэн иккис, онтон үһүс чааһын суруйарын күүтэрин туһунан санаатын үллэһиннэ.   

Оҕо туһунан кини ис дьиҥин арыйан, өйдүүрүн, ылынарын курдук суруйар уустугун санатан туран, бастатан туран, кырачаан ааҕааччы сөбүлээтэҕинэ, айымньы сыалын ситиспитин туһунан этиэххэ сөбүн бэлиэтээтэ.

Кинигэ сүрэхтэниитин туһунан сиһилии "Ил Түмэн" хаһыат кэлэр нүөмэригэр ааҕыҥ. 

Ааптар хаартыскаҕа түһэриитэ.