Иһийии дьикти чуумпута уһуктуу чоруун дорҕооннорунан солбуллар, тула барыта тупсар, эргиччи барыта элэккэй, эйэҕэс- сайаҕас эйгэлэнэр, ил эйэ тыыннанар. Тылларга- тиллэргэ аналлаах тыыллан-хабыллан турарга бэлэмнэнэр, сэргэхсийэр, сөхсүнэр. Халыҥ хаттык буолбут хаар анныгар силис-мутук уһун уутуттан уһуктуо, саҥа лабааны лаглатыа, күөҕү көҕүлүө, суугунуур солкоҕо суулуо. Быыһык кэмҥэ үрүҥ хара мөккүөрэ-моргуора, сылаас тымныы алтыһыыта, кэлэр барардыын киирсиитэ бу барыта кулун тутар кубулҕата, сааскы кэм көстүүтэ. Өбүгэ саҕаттан бу кэмҥэ сэрэхтээх буолууну эрэйэллэрэ, сыыһа-халты туттуунуттан сэрэтэллэрэ, дьаҥтан-дьаһахтан дьалты буоларга дьаһайаллара.
Төрүт дьоммут өркөн өйдөрүнэн улуктуйууттан уһуктарга ас- үөл амтаннааҕын аһатыы суолтатын өрө тутан хаһаас гыммыт хаһаларынан айах тутан, үүнээйи үтүөтүн иҥэриммит, күүс сэниэ киллэринэргэ үтэ гынан хаалларыммыт үөрэ миининэн күндүлээн оччоттон-баччаҕа кэллэхпит. Үйэлэр тухары күүс-сэниэ киллэрэр, турукпутун тупсарар төрүт аспытын киирии астарынан үтүрүйбэккэ, сыа- сым курдук тутан кэмиттэн кэмигэр күндүргэтэ амсайыаҕыҥ, үүт аһынан-үөлүнэн сүһүөхпүтүн бөҕөрҕөтүөҕүҥ, толунньаҥ да уҥуоҕа таба тутан туһаннахха туһалааҕын, наадалааҕын өйдүөххэйиҥ. Дагдайан тахсар күөрчэхпит аныгылыы ааттаан эттэххэ, муодунайдаан эттэххэ омук аһыттан уратыта суох минньигэс, туһалаах эбээт сэгэрдээр эбэтэр тоҥорон сиэтэххэ өссө биһиэнэ иҥэмтиэтинэн, араас буккааһа суоҕунан ордуга биллэр буоллаҕа.
Сахабытын үрдүктүк тутуоҕуҥ, астыын- үөллүүн, тыллыын-өстүүн, таҥастыын- саптыын уратыбытын ыһыктымыаҕыҥ.
Николай Тихонов хаартыскаҕа түһэриитэ.
-
0
-
0
-
0
-
0
-
0
-
0
