Билигин даҕаны бээ тохтооҥ, бэриммэппин, бүгүн даҕаны "бөө" диэн бөөҕүргээн кыһыҥҥы кэм кыһарҕана кырыы хараҕынан кынчыатыыр, өһөс майгытынан өрөлөһөр, хадаар майгытынан хардарсар. Ол эрээри иһэр кэм нэмийэн биэрэн ичигэҺигэн илгийэр, наардаан нарылаан оруо маһы ортотунан буолбуту тохтотон сылааһынан сылаанньытар, ичигэһинэн имэрийэр, сырдыгынан сыдьаайар. Баран эрэр кэлэн иһэрдиин биэтэккэ көрсүһүүлэрэ үрүҥ хара мөккүөрэ буолан сэниэлээх соҕустук силбиэтэниэ, күүстээх соҕустук кыымахтаталыа турдаҕа, ол олох суруллубатах сокуона, кэһиллибэт этиитэ буоллаҕа.
Өбүгэ саҕаттан бэриллибит тулуур-дьулуур тургутууттан иҥиир ситии курдук тардыллан истэх аайы улам чиҥиир, бөҕөргүүр, урут уруккуттан буолбутунан кэтэһиилээх кэм кэрэтин туһугар сэттэ ый тухары сэллээбэт, аҕыс ый тухары сыанан- арыынан аҕаабат,харыс даҕаны саҕаны хамсаабат тоҕус ый тухары тохтообот унньуктаах уһун улугурууну үҥсэргээбэккэ тулуйан-тэһийэн оччолортон баччаларга кэллэхпит. Төрөөбүт төрүт сирбит уратыта уйаны-хатаны уйарга анаан уһунньут тыыннаатаҕа, киэҥ көҕүстээтэҕэ, ол да иһин буолуо бука үһү дии - дии үллэҥнэспэккэ, ини дии- дии иҥнэл- таҥнал барбакка, буолуо дии- дии буомуран хаалбакка дьоһун, дьиппиэн буоллахпыт. Төрүт дьоммут үтэ гынан хаалларбыт үтүмэн үтүө үгэстэрэ, кэһии гынан кээспит кэрэҕэ-сырдыкка тардыһыылара муҥкук санааны кыйдаатын, кэнэн санааны киэр гыннын.
Хаартыска Мария Васильева, СИА.
-
0
-
0
-
0
-
0
-
0
-
0
