Хонууга хороҕор муостаах хойунна, сыһыыга сыспай сиэллээх сыбыытаата, хотоҥҥо ньирэй мэҥирээтэ, далга төрөөбүт ынах далбарданна, сыалаах отунан сыҥаланна, күөх отунан күндүлэннэ. Олбуор аайы хомуйар- имийэр үлэ олохтонно, тэлгэһэ аайы бэрийэр- тэрийэр үлэ тэрилиннэ. Тыллыан баҕалаах силиһин сиигирдэн ууну ыймахтаата, тиллиэн баҕалаах лабаатын аайы үнүгэһи уһугуннарда, хонууга хоммут уу уйгу төрдө, сыһыыга хаалбыт уу быйаҥ төрдө буолуо.
Улуу эбэлэр кыһыҥҥы кыаһаантан быыһанардыы, муус хабалатыттан босхолоноору кырамталаан, кыччатан, чарааһырдан төлө биэрэрдии өрүтэ тыыммыттара хааттан тахсан халаан уута буолан халыйыа, утаппыты угуттуо, куурбуту- хаппыты уулатыа.
Тымыр буолан суккуллар сыккыс уулара быстыбакка устаннар сап да саҕаттан салҕанан үрэхтэргэ түһүөхтэрэ,үрүлүһэ сүүрүөхтэрэ.
Сааскыга диэн ууруллубут бэттэх кэллэ, кыстыгы туораабыт улаҕа диэки уурулунна. Хаһаас ас хостонно, уурунуу ас наарданна, ордуга- хоһута түҥэтиккэ баран кэһии, ааҕыллан- суоттанан сыа- сым курдук тутуллан күндүлүүр ас буолла. Сэниэ киллэрэргэ анаммыт үөрэ миинэ бургуччу, күүс-уох эбинэргэ диэн кэһиллибит сыалаах эт ыргыччы буһарыллыахтара, сатабыллаах хаһаайкалар хаалларыммыт хааһын, кистээбит куһун кулуһун уотугар бидилитэ бэлэмниэхтэрэ, будулута оргутуохтара, мустубут көлүөнэ ситимэ дьоннорун күндүлүөхтэрэ.
Саҥа күн сандаарар сардаҥалара сырдыгынан эрэ сыдьаайдыннар, сылааһынан эрэ тыынныннар.
Саҥа күнүнэн сэгэрдээр!
Хаартыска СИА.
-
0
-
0
-
0
-
0
-
0
-
0
