Алтаай Өрөспүүбүлүкэтигэр Алтаай эпоһын декадатын тэрийэр туһунан дьаһалы Алтаай Өрөспүүбүлүкэтин баһылыга Олег Хорохордин б. дь. олунньутугар илии баттаабыта. Декаданы аһыы үөрүүлээх тэрээһинин саҕаланыытыгар өрөспүүбүлүкэ баһылыга Алтаай эпоһын декадата тэриллиитэ алтаай норуотун эпическэй нэһилиэстибэтин (мэҥэ тойугун) харыстааһыҥҥа, үөрэтиигэ, тарҕатыыга улахан суолталаах саҥа олук буолуоҕа диэн бэлиэтээтэ. Маныаха Саха сиригэр олоҥхону харыстааһыҥҥа ыытыллар үлэни холобур аҕалла.
Ил Түмэн бастакы вице-испиикэрэ Алтаай дьонун-сэргэтин Алтаай эпоһын декадата аан бастаан тэриллибитинэн уонна аны маннык тэрээһин, Саха сиригэр курдук, сыл ахсын ыытыллар буолбутунан истиҥник эҕэрдэлээтэ. Александр Жирков Алтаай Өрөспүүбүлүкэтин баһылыгар Олег Хорохордиҥҥа, өрөспүүбүлүкэ уопсастыбаннаһыгар, норуот эпическэй айымньытын, төрүт култууратын илдьэ сылдьааччыларга, харыстаһааччыларга, үөрэтээччилэргэ барыларыгар Саха Өрөспүүбүлүкэтин Ил Дарханын Айсен Николаев уонна Өрөспүүбүлүкэ уопсастыбаннаһын, өрөспүүбүлүкэтээҕи «Олоҥхо» ассоциация ааттарыттан эҕэрдэ тириэртэ, кэскиллээх, өр сыллаах үлэҕэ ситиһиилэри баҕарда. Кини саха олоҥхотун, фольклорун, ону ааһан саха тылын харыстааһыҥҥа Саха сиригэр ыытыллар үлэ туһунан кылгастык билиһиннэрдэ уонна бу хайысхаҕа бииргэ үлэлииргэ ыҥырда.
Алтаай Өрөспүүбүлүкэтин үс ыҥырыылаах Эл Курултайын Бэрэссэдээтэлэ, РФ VII ыҥырыылаах Судаарыстыбаннай Дууматын дьокутаата, Алтаай народнай суруйааччыта Иван Белеков, Алтаай суруйааччыларын Сойууһун салайааччыта Бронтой Бедюров Алтаай эпоһын декадата Саха сирин холобурунан тэриллибитин бэлиэтээтилэр, инникитин икки өрөспүүбүлүкэ икки ардыгар бу эйгэҕэ хардарыта бииргэ үлэлээһин эбии күүһүрэн иһэригэр баҕаларын эттилэр.
Алтаай Өрөспүүбүлүкэтигэр Алтаай эпоһын декадата Саха сиригэр курдук 10 күн ыытыллар буолуоҕа. Саха сирин бэрэстэбиитэлэ декада чэрчитинэн ыытыллар хас да тэрээһиҥҥэ, ол иһигэр Алтаай хайчыларын (эпическэй айымньыны толорооччуларын) сүбэтин тэрийии мунньаҕар, Алтаай Бырабыыталыстыбата тэрийэр Алтаай тыллаах норуоттар эпическэй нэһилиэстибэлэрин (мэҥэ тойуктарын) үөрэтии уонна тарҕатыы туһунан ЮНЕСКО кыттыылаах научнай кэмпириэнсийэҕэ кыттыыны ылыаҕа.
Эмиэ Алтаай эпоһын декадатын чэрчитинэн Александр Жирков былыргы (национальнай) ох саалары оҥорор дьарыктаах маастардар оҥоһуктарын билистэ. Кини Алтаай Өрөспүүбүлүкэтин оҕунан ытыыга федерациятын салайааччытын Александр Сельбиковы көрсөн алтаай оҕунан дьарыктанааччылары быйыл от ыйыгар Саха сиригэр Өймөкөөҥҥө ыытыллар Олоҥхо ыһыаҕар кытталларыгар ыҥырда.
Алтаай Өрөспүүбүлүкэтигэр сырыытын официальнай чааһыгар Александр Жирков Алтаай Өрөспүүбүлүкэтин Баһылыга Олег Хорохордины, Эл Курултай Бэрэссэдээтэлин Артур Кохоевы кытта көрүстэ.
-
0
-
0
-
0
-
0
-
0
-
0
