Былатыан Ойуунускай, Максим Аммосов, Исидор Барахов, Степан Аржаков, о.д.а. судаарыстыбаннай уонна бэлитиичэскэй диэйэтэллэр Сахабыт Сирэ автономнай өрөспүүбүлүкэ буолан, сайдыы саҥа үктэлигэр тахсарын ситиспиттэрэ.
Гавриил Чиряев 17 сыл өрөспүүбүлүкэни салайан олорбута, кини кэмигэр ХХ үйэ 1960-1980 сс. сир баайын хостоон, туһаҕа таһаарар бырамыысыланнас, энергетика, норуот хаһаайыстыбата, социальнай эйгэ күүскэ сайдыбыта. Кини судаарыстыбаннай уонна бэлитиичэскэй диэйэтэл быһыытынан үтүө аата Улахан Сэбиэскэй Энциклопедияҕа киирбитэ.
Ил Түмэн Бэрэссэдээтэлин солбуйааччыта Антонина Григорьева өрөспүүбүлүкэ Күнүнэн эҕэрдэлээн туран, бүгүн икки бүк бырааһынньык буоларын бэлиэтээтэ. Муус устар 27 күнүгэр 1992 с. биһиги өрөспүүбүлүкэбит Төрүт сокуонун ылыммыппыт.
«Мин таайым Гавриил Чиряев көмөлөһөөччүтүнэн үлэлээбитэ, онон кинини үгүстүк көрөр, билэр этим. Үрдүк эрудициялаах, ис култууралаах, сэмэй, чиэһинэй салайааччы этэ. Кини өрөспүүбүлүкэни салайар кэмигэр таас чоҕу, алмааһы, көмүһү хостуур бырамыысыланнас күүскэ сайдыбыта. Нерюнгри, Удачнай курдук куораттар тэриллэн, үүнэн-сайдан барбыттара. Беркакиттан Дьокуускайга диэри тимир суол тутуута саҕаламмыта. Итинник стратегическай суолталаах үгүс-үтүмэн үлэ тэриллибитэ», — диэн эттэ Антонина Григорьева.
СӨ ыччатын уонна социальнай коммуникациятын миниистирэ Петр Шамаев өрөспүүбүлүкэ бастакы салайааччылара 20-лээх эдэр дьон төрөөбүт дойдуларын сайыннарарга дьоһун үлэни оҥорбуттарын туһунан эттэ.
«Мин эмиэ Бүлүүттэн төрүттээх буоларым быһыытынан, биир дойдулаахтарбытыгар Гавриил Чиряев аата үрдүктүк тутуллар үтүө холобур буолар. Кини олоҕор араас очурдары туораабыта, Аҕа дойдуну көмүскүүр уоттаах сэриигэ баҕа өттүнэн барбыта, оттон дойдуну чөлүгэр түһэрэргэ туох баар күүһүн-уоҕун биэрэн үлэлээбитэ», — диэтэ Петр Шамаев.
Өрөспүүбүлүкэтээҕи офтальмологическай балыыһа кылаабынай бырааһа Иван Луцкан этэринэн, Гавриил Чиряев өрөспүүбүлүкэни салайар кэмигэр Саха Сиригэр оҥорон таһаарыы 23 төгүл үрдээн, эдэр ыччакка кини килбиэннээх үлэтэ үтүө холобур буолар!
-
0
-
0
-
0
-
0
-
0
-
0
