Балаҕан ыйын 1 күнэ ханнык баҕарар киһиэхэ ураты суолталаах. Бу күнтэн биһиги билиигэ айаммыт саҕаланар. Эрэнэбин, оскуола боруогун саҥа атыллаабыт кырачааннарга оскуолатааҕы сыллара элбэх үтүө түгэннэрэ бэлэхтиэҕэр.
Үөрэх суолтата хаһан да сүппэт. Билиигэ тирэҕирэн, үрдүк чыпчааллары дабайабыт, дьоһун олоҕу олоробут, үлэбитигэр ситиһиилэнэбит. Билиҥҥи үөрэх сүрүн соруга – оҕону личность быһыытынан сайыннарыы, талаанын, дьоҕурун арыйыы, олоххо бэлэмнээх киһини иитэн таһаарыы.
Бу күн оҕолорго эрэ буолбакка, учууталларга эмиэ кэтэһиилээх бырааһынньык. Аныгы үйэҕэ үрдүкү технологиялар үөрэх сорҕото, уһуйуу ньымата буоллулар. Ол эрээри учуутал үөрэтэрин-такайарын эт кулгааххынан истэр, илэ хараххынан көрөр быдан ылыннарыылаах, ону туох да солбуйуо суоҕа. Тыыннаах кэпсэтии, сирэй көрсөн сэһэргэһии оҕо толкуйдуур, анаарар, саҥарар дьоҕурун сайыннарар.
Быйылгы үөрэх дьыла букатын атын усулуобуйалаах саҕаланар. Ол хоруона хамсыгыттан харыстанар сыалтан. Бу пандемия барыбытын үтэн-анньан, тургутан көрөр. Ол гынан баран, биһиги оскуолаларбыт ол тургутууну бэркэ ааспыттара, ааһыахтара даҕаны. Ол курдук, дьиэттэн олорон, Интернет ситимин нөҥүө үөрэтиини кылгас кэм иһигэр суһаллык бэркэ тэрийэ охсубуттара. Билигин өрөспүүбүлүкэ үрдүкү салалтатыгар уонна үөрэҕирии салаатыгар үөрэҕи сэрэхтээхтик, оҕоҕо ыарыы суоһаабатын курдук тэрийэр сорук турар.
Барыгытыгар чэгиэн-чэбдик буолууну баҕарабын! Бэйэҕитигэр эрэллээх буолуҥ уонна сыалгытын-соруккутун ситиһиҥ!
Ил Түмэн Судаарыстыбаннай Мунньах бэрэссэдээтэлэ Петр Гоголев.
-
0
-
0
-
0
-
0
-
0
-
0
