Балаҕан ыйын 1 күнэ – биһиги дойдубутугар биир саамай дьоро, хас биирдиибитигэр ураты, бэлиэ күн. Биһиги дьоллоох оҕо сааспытын, умнуллубат оскуолатааҕы уонна устудьуоннаабыт сылларбытын, бастыҥ доҕотторбутун, үөрэппит учууталларбытын, эдэр күүстээх ыра санааларбытын – барытын бииргэ түмэр кэрэ өйдөбүлү кытта ситимнээх.
Арассыыйа педагогикатын төрүттээччилэриттэн биирдэстэрэ Константин Дмитриевич Ушинскай төрөөбүтэ 200 сылыгар учуутал идэтин суолтатын үрдүктүк бэлиэтээн туран, Арассыыйа Федерациятын Бэрэсидьиэнэ Владимир Путин 2023 сылы Учуутал уонна настаабынньык сылынан биллэрбитэ ордук үөрүүлээх. Үөрэх эйгэтигэр ханнык да саҥа уларыйыылар киирбиттэрин, үөрэтии эйгэтэ кэҥээбитин, уустугурбутун иһин, үөрэх-билии эргийэр киинэ мэлдьи учуутал, иитээччи буолуоҕа. Биһиги оҕолорбутун үөрэтэр, иитэр үтүө аналлаах күндү педагогтарбытыгар ураты махталбын уонна эҕэрдэбин тиэрдэбин.
Саха сирин бары оскуолаларыгар быйыл 16 тыһыынчаттан тахса оҕо маҥнайгы кылааска киириэҕэ. Биһиги оҕолорбут үөрэх, билии киэҥ аартыгар эрэллээхтик уонна дьоһуннаахтык үктэнэллэригэр төрөппүттэр, учууталлар өйөбүллэрэ, болҕомтолоро бу олохторун бастакы дьоһуннаах түгэнигэр күүс-көмө, тирэх буолуоҕа.
Хас биирдии киһи олоххо ситиһиитэ, табыллыыта билии ылбыт, үөрэммит сириттэн – оскуолаттан саҕаланар. Үөрэхтээх, билиилээх киһи инникитэ ордук кэскиллээх, төрөөбүт сиригэр-уотугар, тус бэйэтигэр, дьонугар-сэргэтигэр туһата улахан.
Күндү үөрэнээччилэр, устудьуоннар, Саха сирин сарсыҥҥытын салайсар, эрэнэр кэскилбит, үөрэҕи, кынат оҥостуҥ, үүнүҥ, сайдыҥ, саҥаттан-саҥа билиигэ, үтүөҕэ дьулуһуҥ! Үөрэххэ, үлэҕэ үрдүк ситиһиилэри, саҥа чыпчаалларга тириэрдэр кыайыылары баҕарабын!
Саха Өрөспүүбүлүкэтин Ил Түмэнин Бэрэссэдээтэлэ Алексей Еремеев
-
0
-
0
-
0
-
0
-
0
-
0
