Сэргээ

Хой

Хой бэлиэтигэр төрөөбүттэргэ сыл саҕата айаҥҥа-күүлэйгэ олус үчүгэй кэм. Ол айан хайаатар даҕаны тас дойдуга буолбакка, даачаҕа да тахсан сынньанарга барсар. Онон сынньанар, чаҕылхай өйдөбүл буолар күннэри атаарар итиэннэ саҥа саҕахтары арыйар кэм буолуо. Оттон муус устартан от ыйын ортотугар диэри табыллыы-сатаныы эрэ арыаллыа. Бу кэм дуоһунаска өрө тахсыыга, үп өттүгэр ситиһиигэ, тус олоххор төбө эргийэр кыайыыларыгар барытыгар тэҥинэн үчүгэйи эрэ түстүө. От ыйын иккис аҥаарыттан итиэннэ атырдьах ыйыгар сынньанар уонна күүс-уох ылынар табыгастаах. Ылыллыбыт сэниэҕит, күүскүт-күдэххит балаҕан ыйыгар – алтынньыга өссө биир модун хардыыны оҥорорго тиэрдиэ. Ол кэнниттэн тиниктэһэн ылбыт кыайыыларгын көмүскүүргэ бэлэмнэниэххин наада. Сэтинньи уонна ахсынньы бастакы аҥаара сыһыан итиэннэ дьыалабыай бырайыактар төһө бөҕө туруктаахтарын тургутан көрүөн сөп. Эйигин өйүүр эрэллээх дьону бэйэҥ тула мус, итиэннэ туохтан даҕаны долгуйума, сыл бүтэһигэр барыта орун оннугар түһүөҕэ. 

Оҕус

Сыл саҕатыгар ааспыт сылтан сүгэһэр оҥостон кэлбит олоҕуҥ иэрэҥ-саараҥ өрүтүттэн быыһаныаҥ. Олунньуттан кулун тутарга диэри туох баар мэһэйдэри туоруоҥ, урукку кыһалҕаларгын кыайыаҥ, хайдахтаах даҕаны сатаан кыаллымыах курдук түгэннэртэн тахсар суолу булуоҥ. Эн дьаныардаах санааҥ, үлэни таптыырыҥ уонна сылдьан эрэ оҥоро сылдьар майгыҥ чэпчэкитик санааҕын тиэрдэргин, саҥа бырайыагы хамсатаргын түстүө. Сайын сыл ситиһиилээх уонна киһи дуоһуйар элбэх түгэннэрдээх кэмэ буолуоҕа. Күһүн мунньуллубут сылааҥ уонна стресс бэйэлэрин биллэрбэттэрин инниттэн, балаҕан ыйыгар уоппускаҕа барыыны толкуйдаа. Кыһын үүнүүтэ үлүскэн үлэҥ арыый үмүрүйүө, онон сыл бүтэһигэр олоҕуҥ уһулуччу пуорматыгар киириэҥ.

Игирэлэр

Үүнэр сылга тус олоҕуҥ болҕомто киинигэр сылдьыа. Олоҕуҥ аргыһын көрсө илик буоллаххына, эйигин романтика өссө төгүл романтика күүтэр. Үлэ чааһыгар, тохсунньуга биэтэҥнии түһүө. Ол эрээри, олунньуга орун оннугар түһэн тэтимириэ. Бэс ыйыттан булгуччу үчүгэй, үтүө өрүттээх кэмнэр үүнүөхтэрэ: айан, айыы-тутуу, ити барыта үп дэлэгэйинэн арыаллаһыа. Харчы быйыл кыахтаах билэр дьоҥҥуттан кэлиэҕэ: кинилэр эйигин ымыылыахтара, эбэтэр барыстаах бырайыакка ыҥырыахтара. Онон урукку сибээстэргин сөргүтэргин сүрэҕэлдьээмэ, көхтөөхтүк доҕотторгун кытта кэпсэт, идэҕинэн үчүгэй өттүгүн саната сырыт. Балаҕан ыйыттан сыл бүтэһигэр диэри добуочча эниэргийэлээх кэм: эн бэлиэҕэр Марс тиийэр. Ити кэмҥэ олоҕуҥ бары эйгэтигэр – тус сыһыаҥҥар, дуоһунаска дабайыыгар, үпкэр – табыллыы эрэ аргыстаһыа.

Араак

Ааспыт сылга түстээбит кыһалҕаларын боруостаабыттыы, 2022 сыл бастакы ыйдара араактарга ситиһииттэн уонна үөрүүттэн саҕаланыа. Муус устар уонна ыам ыйа өссө өрө күүрүүлээх буолуоҕа, ааспыт сылга табыллыбатаххын хас эмэ бүк дэлэйдик төлөһүө. Сайыҥҥы ыйдартан от ыйын бэлиэтиэххэ наада, эйиэхэ табыллыыны эрэ түстүүр түгэннэри бэлэхтииртэн кэччэниэ суоҕа – эн төрөөбүт ыйгыттан атыны тугу күүтүөххүнүй?! Балаҕан ыйа даҕаны куһаҕана суох, өйүҥ сытыыта уонна булугаһа атын дьон ортолоругар эйигин таһыччытык бэлиэтиэ. Алтынньыга бэйэҥ көрүүгүн харса суох кырыктаахтык туруулаһыаххын сөп. Ол оннугар сэтинньи дьыалаҕа-куолуга ситиһиини, таптал чааһыгар табыллыыны түстүө. Ити дириҥ толкуй уонна иэйии ыйа. Ахсынньыга олоҕуҥ бары хайысхатыгар кыайыылаах буолуоҥ.

Хахай

Романтиканан үлүһүйүү өттө кэлэр сылга дохсуннук саҕаланыа. Үлэ чааһыгар оннук диэбэккин: тохсунньуга дьыалаҥ хаахыр-кыыкыр курдук барыаҕа. Ол эрээри олунньуга оннун булуо. Ити ыйы инники бырайыактаргын кичэйэн бэлэмнииргэр, юридическэй боппуруостары быһаараргар уонна салалтаттан итиэннэ үрдүкү инстанциялартан биһирэбили ыларгар сулустар сүбэлииллэр. Муус устарга туох баар сыраҕын барытын уур уонна бэс ыйа бүтүөр диэри ол тэтимҥин ыһыктыма. Ити кэмҥэ сыл саамай суолталаах ситиһиилэрин ситиһиэххин сөп. От ыйыгар кыратык намырыаххын наада, оттон атырдьах ыйыгар уоппуска ыларыҥ бэрт буолуо этэ. Балаҕан ыйыттан дьыалаҥ туйгуннук барыаҕа: сыалгар күчүмэҕэйи көрбөккө хаамыаҥ уонна олус бэрт түмүктэри ситиһиэҥ.

Кыыс

Тута оҥорууттан туттунарыҥ буоллар. Үтүө өрүттээх кэм, ол эрээри, үчүгэйдик толкуйдаммыт үлэҕэ-хамнаска эрэ. Кулун тутар ый үөрэххэ уонна уһун айаҥҥа барсар. Муус устар уонна ыам ыйа айылҕа туругуттан тутулуктаммакка омуннаах-төлөннөөх, куйаас буолуоҕа. Муус устар үрдүк көхтөөҕүнэн уратылаһыа, оттон ыам ыйа тус олоххор имэҥи күрүлэтиэ. Бэс, от ыйдара имэҥ арыый үмүрүйүө, сыһыан дьүөрэлэһэр суолга киириэ. Ити икки ый айаҥҥа эмиэ барсаллар – мүөттээх ый буолбатах ини? Атырдьах, балаҕан ыйдара чуумпутук ааһыахтара, чуҥкуктук да диэххэ сөп. Алтынньы иккис аҥаарыттан бэйэҥ бүлүүһэҕэр сылдьар курдук сананыаҥ. Сыл бүтүтүөр диэри табыгастаах кэмнэр. Болҕой, өскөтүн уруу айана сайын табыллыбатах буоллаҕына, саппааска сэтинньи баар.

Салгыытын күүтүҥ