Идэтийбит астролог, суруйааччы, сэртипикээттээх БаЦзы, Цзы Вэй Доу Шу – 12 Дыбарыас, Джойтиш ведическай астрология консультана Александра Киселева 2023 сылга туох күүтэрин туһунан бэйэтин санаатын үллэһиннэ.
Кини этэринэн, Баабыр сыла Куруолук сылыгар бэлэмнэнии быһыытынан ааһан эрэр. Александра киһи хайа баҕарар түгэҥҥэ сырдыкка эрэлин ыһыктыбакка үчүгэйи эрэ саныахтааҕын, санаа күүһүнэн аан дойдуга буола турар быһыыны-майгыны уларытар кыахтааҕын бэлиэтиир.
«Дьиэбитигэр кэлэн биһиги чугас дьоммутун кытта хайдах баарбытынан сылдьабыт, манна күүс-тирэх ылабыт, Куруолук сылыгар бэйэ-бэйэҕэ истиҥ-сылаас сыһыаны олохтуохха наада. 2023 сылга уонна өрүү даҕаны эһигини дьиэ кэргэҥҥит өйүөҕэ. Үлэ, күннээҕи түбүк ааһар дьэргэлгэн, оттон олох хайа баҕарар түгэнигэр чугас дьоҥҥут сылаас сыһыаннара санааҕытын кынаттыа, күүскүтүгэр күүһү эбиэ. Онон кинилэргэ болҕомтолоох буолуҥ, эһиги сылаас сыһыаҥҥыт, истиҥ тапталгыт кэлин уон оччонон эргиллэн кэлиэ.
Билигин куйаар ситимин нөҥүө үлэлиир, онлайн куурустары ыытар дьоҥҥо ситиһиилээх кэм тосхойдо. Сарсыардаттан киэһээҥҥи диэри хонтуораҕа эрэ олорон дьон хамнастанар диэн өйдөбүл эргэрдэ. Дьиэҕэ олорон онлайн үлэлээн-хамсаан, аан дойдуга буола турар быһыыга-майгыга түргэнник туттан-хаптан, саҥа сүүрээни кытта тэҥҥэ барсан иһиэххэ наада. Холобур, оҥорор өҥөҕүтүн тас дойдуга таһааран атыылаан барыыһырыахха сөп. Дохуоккутун хаҥатарга саҥа үүтү-хайаҕаһы көрдөөҥ, биир сиргэ олорон хаалымаҥ», — диэн сүбэлиир кини.
Бу үүммүт сылга түргэн-тарҕан туттунуулаах, барыылаах-кэлиилээх, бэйэ дьыалатын киэҥ эйгэҕэ таһааран, саҥаттан саҥа үктэли эрэллээхтик дабайан иһэр дьон халыҥ харчыны, үтүмэн үбү аахсыахтарын сөбүн туһунан этэр астролог.
-
2
-
0
-
0
-
0
-
0
-
0
