Бу сокуон тыа хаһаайыстыбатын бородууксуйатын кэтээн көрүү уонна сүөһү сыстыганнаах ыарыыларын бохсор сыалтан оҥоһуллар. Хас биирдии маркировка бэйэтэ тус нүөмэрдээх, ол сүөһүнү (кыылы) учуоттуур судаарыстыбаннай систиэмэҕэ киллэриллэр, манна сүөһү ханнык быһыыны ылбыта, сааһа, боруодата, хаһаайына ыйыллар. Тыа хаһаайыстыбатыгар сыһыана суох кыыллары (куосканы, ыты) итиэннэ тыа, уу кыылларын маркировкалыыр ирдэммэт.
Судаарыстыбаннай Дуума сокуон барылын иккис ааҕыыга дьокутааттар Владимир Бурматов уонна Иван Лоор тыа хаһаайыстыбатыгар сыһыана суох, хаһаайыннаах кыыллары итиэннэ тыа, уу кыылларын маркировкалааһын хаһаайын баҕа өттүнэн оҥоһуллуон сөбүн туһунан этиилэрин өйөөбөтөҕө. Сокуоҥҥа этиллэринэн, кыылы-сүөлү маркировкалыыр туһунан иһитиннэрии бэтэринээрийэ Биир кэлим федеральнай иһитиннэрэр ситимигэр (ВетИС) таһаарыллар, Бырабыыталыстыба маркировканы туруоруу уонна учуоттааһын уратыларын олохтуур, оттон Тыа хаһаайыстыбатын министиэристибэтэ бэтэринээрийэ тустаах быраабылаларын бигэргэтэр. Бу быраабылалар маркировкалааһын бэрээдэгин, тииптэрин, уратыларын, идентификация нүөмэрдэрин, чахчылар кэрискэлэрин, бэриллэр болдьоҕун быһаарыахтара. Сүөһүнү бас билэччи, бэтэринээрийэ быраабылатыгар олоҕуран, маркировка тиибин бэйэтэ талаллар.
Саҥа сокуон 2023 сыл балаҕан ыйын 1 күнүттэн олоххо киллэриллиэҕэ. Онуоха диэри маркировкаламмыт сүөһүлэр, ол иһигэр омук сириттэн аҕалыллыбыттар, иккистээн бэлиэтэммэттэр. Маркировкаланар сүөһүлэри учуоттааһын миниистирдэр кэбиниэттэрэ олохтообут болдьоҕор, ол эрээри 2024 сыл кулун тутар 1 күнүн кэнниттэн ыытыллар. Судаарыстыбаннай Дуума ити күнтэн саҕалаан, чааһынай ыаллар сүөһүлэрин федеральнай бүддьүөт суотугар маркировкалыырга Бырабыыталыстыбаҕа сүбэлээтэ. Быһаарар сурукка маркировка сыаната маннык быһылынна: пластмассабай бииркэ 14-20 солк., туруоруута 50-70 солк.; тирии анныгар угуллар микрочиип 90-140 солк., туруоруута 50-100 солк.; болюс 150-200 солк., киллэриитэ 100-150 солк.; татуировкалааһын уонна тавролааһын 200-500 солк.; биһилэх 5-10 солк., кэтэрии 20-50 солк.; моойторук 150-250 солк.
Саха Өрөспүүбүлүкэтигэр ынах сүөһүгэ уонна куоскаҕа маркировканы туруоруу үлэтэ 2020 сылтан саҕаламмыта. Онон, бас билии көрүҥүттэн тутулуга суох өрөспүүбүлүкэ сүөһүтүн 60 %-на, ыт 80 %-на маркировкаламмыт.
-
0
-
0
-
0
-
0
-
0
-
0
