Чөлүгэр түһэрэр үлэ халаан бастакынан ылбыт Суордаах уонна Томтор сэлиэнньэлэригэр саҕаламмыт, манна 20 байыастаах тутар этэрээт үлэлиир. Таһаарыллыбыт хоромньу алта нэһилинньэлээх пууҥҥа ааҕыллыбыт. Аны Дьааҥы куората, Боронук, Баатаҕай уонна Хайыһардаах хаалбыттар. Тоҕус нэһилинньэлээх пуунтан уу түспүт, Хайыһардаахха үс ыал олбуора билигин да ууга турар. Кэлиҥҥи түөрт чаас устатыгар уу 11 см түспүт. Быыһааччылар тустаахтарга көмөлөһө уонна уу түргэнник түһэригэр ханаал оҥоро сылдьаллар.
– Сүүһүнэн ыал олорор дьиэтин-уотун, тиэргэнин уонна элбэх социальнай эбийиэктэри уу ылбыта. Биһиги сорукпут – олору барытын кылгас кэм иһигэр, балаҕан ыйыгар диэри, чөлүгэр түһэрии буолар. Сорох дьиэҕэ акылааты уларытар, ханна эрэ сөргүтэр үлэ, кырааскалааһын, туттар тэрили уларытыы ирдэниэҕэ, – диэтэ Дмитрий Садовников.
Дааҥы улууһугар халаан содулун туоратыыга суһал ыстаабы салайар, Арктиканы сайыннарыы миниистирэ Владимир Черноградскай бу күннэрдээҕи сүрүн соругунан сибээһи хааччыйыы, хоромньуну ааҕыы, тутуу матырыйаала төһө баарын көрүү уонна ону эмсэҕэлээбит нэһилиэктэргэ тиксэрии итиэннэ тыа хаһаайыстыбатын салаатыгар үлэ буоларын эттэ.
Санатан эттэххэ, халаан уута Хайыһардаах, Томтор, Токума, Үҥкүр, Сыһыы-Мэйиитэ, Боронук, Суордаах, Бөтөҥкөс, Томтор сэлиэнньэлэрин, Дьааҥы куоратын ылбыта. Улуус киинигэр нефтебазаны кыратык ылбыта, оттон Баатаҕай бөһүөлэгин олохтоохтор быһыт оҥороннор быыһаабыттара. Бу туһунан Ил Дархан уонна Бырабыыталыстыба пресс-сулууспата иһитиннэрэр. Бүгүн Арассыыйа Федерациятын бырабыыталыстыбатын солбуйааччы-Уһук Илиҥҥи федеральнай уокурукка Бэрэсидьиэн боломуочуйалаах бэрэстэбиитэлэ Юрий Трутнев Саха сиригэр кэлэр, үлэтин Дьааҥыттан саҕалыыр.
- 0
- 0
- 0
- 0
- 0
- 0