Бу улахан түһүлгэҕэ ыраах Дьааҥы улууһуттан биэс киһилээх дэлэгээссийэ сырытта. Ол туһунан тыа хаһаайыстыбатын управлениетын начаалынньыга, улуус дьокутаата Кэскил Ефимова маннык кэпсээтэ:
– Улууспут салалтатын, чуолаан баһылыкпыт Владислав Иванов сүбэтинэн, дойду үрдүнэн агрооскуолаларга болҕомто күүһүрбүт кэмигэр, атыттар хайдах үлэлиилэрин көрдүннэр-иһиттиннэр, үөрэнниннэр диэн агрооскуолалар бэрэстэбиитэллэрэ: Боруулаах оскуолатын мастар-педагога Зинаида Стручкова, Сартаҥ оскуолатын учуутала Матрена Слепцова, Арыылаах оскуолатын маастар-педагога Евдокия Старостина, Сартаҥ нэһилиэгин дьаһалтатын тыа хаһаайыстыбатыгар исписэлииһэ Сардаана Аммосова уонна мин, бэһиэ буолан сылдьан кэллибит.
Куонкурустарга кыттыбатахпыт, дыалабыай бырагыраамаларга сырыттыбыт. Агроотехүөрэхтээһиҥҥэ, агротуризмҥа аналлаах араас сиэссийэлэр тэрилиннилэр. Биһиэхэ биир саамай суолталаах кэпсэтии, сенатор Егор Борисов көҕүлээһининэн тэриллибит, быйыл аан бастаан ыытыллар сылгыны үөрдээн иитиигэ аналлаах төгүрүк остуол буолла.
Арассыыйа Федерациятын тыатын хаһаайыстыын миниистирин солбуйааччы Роман Некрасов кытынна, Сылгыны иитии үнүстүүтүн дириэктэрэ Александр Зайцев Арассыыйаҕа сылгыны иитии уопсай туругун туһунан билиһиннэрдэ. Араас эрэгийиэннэр бэрэстиибэллэрэ бэйэлэрин үлэлэрин сырдаттылар. Биһигиттэн «Дьөһөгөй» бааһынай хаһаайыстыта баһылыга Вячеслав Нестеров Саха Сиригэр сылгыны үөрдээн иитии уратыларын туһунан кэпсээтэ.
Хорриот учуокка киллэрии туһунан киэҥ кэпсэтии таҕыста, дьэ, биһиэхэ бу кыалла илик боппуруос буолар. Бүрээт Өрөспүүбүлүкэтин тыатын хаһаайыстыбытын академията сылгыга племенной учуоту ыытарга сыыппаранан саҥа платформаны оҥорбут. Сылгыны төрүөҕүттэн саҕалаан, туох баар чахчыларын, генетикатын уо.д.а. учуокка сыыппара технологиятынан тыаҕа да илдьэ сылдьан киллэриллэр уонна интернеттээх сиргэ тиийдэххэ, ол чахчылар бырагыраамаҕа бэйэлэрэ киирэн хаалар эбиттэр.
Хаартыска: Кэскил Ефимова.
-
0
-
0
-
0
-
0
-
0
-
0
