– «Полюс холода» кэпэрэтиип иһинэн үлэлиир «Алгыс» кэпэрэтиипкэ бүгүн, ахсынньы 22 күнэ, ураты үөрүүлээх буолла. Боронук аграрнай хайысхалаах орто оскуолатын дириэктэрэ Нина Потапова салалтатынан оскуола үлэһиттэрэ (учууталлар Евдокия Бережнева, Мария Местникова, Наталья Тимофеева, техүлэһиттэр Петр Рожин, Мичил Горохов, Иннокентий Слепцов) пиэрмэҕэ кэлэн, үлэһиттэри солбуйдулар. Биир өрөбүлэ суох, ыарахан үлэҕэ сылдьар дьону сынньатан, улахан көмөнү оҥордулар. Кыргыттар ынахтары ыатылар, аһаттылар, оттон уолаттар от киллэрдилэр, сааҕы таһаардылар, эбиитин биир тоҥмут турбаны өрөмүөннээн биэрдилэр. Бары наһаа көхтөөхтүк, үөрэ-көтө үлэлээтилэр.
– Хотоҥҥут сылаас, муостата көнө, оккут, уугут дэлэй эбит, – диэн астыннылар.
Онон улахан көмөлөрүн иһин Боронук агро-оскуолатын үлэһиттэригэр махтанабыт. Кэлэн иһэр саргылаах Саҥа дьылынан итиитик-истиҥник эҕэрдэлиибит, чэгиэн-чэбдик доруобуйаны, ситиһиини, табыллыыны, дьолу-саргыны баҕарабыт!!!
Хаартыскалары Екатерина Портнягина хааччыйда.
-
4
-
0
-
0
-
0
-
0
-
0