Вице-премьер Айсен Николаевтыын олохтоохтору кытары көрүстэ, уу ылбыт сирин-уотун бөртөлүөтүнэн кэрийэн көрдө. Дьааҥы куоратыгар уу 210 олбуору, 120 чааһынай дьиэни, 69 элбэх кыбартыыралаах дьиэни ылбыт, олорго барыта холбоон, 514 киһи, ол иһигэр 132 олорор. Бүгүҥҥү туругунан, уу түспүт. Олохтоохтор дьиэлэрин-уоттарын куурда сылдьаллар, биир кэмнээх көмөҕө сайаапка түһэрэн эрэллэр. Букатын туһатыттан тахсыбыт дьиэ суох эрээри, үгүстэр маллара-саллара, оҕуруоттара, тиэхиньикэлэрэ ууга былдьаммыт. Олохтоохтор көрсүһүүгэ биир кэмнээх көмөнү уонна малы-салы сүтэрбиттэргэ көрүллэр көмөнү таһынан судаарыстыбаттан туох эбии көрүллэрин туһунан чопчуластылар.
Юрий Трутнев эмсэҕэлээбиттэргэ көмөнү толору кээмэйинэн уонна суһалык тиэрдэргэ, социальнай суолталаах эбийиэктэри, хочуолунайдары, уһуйааннары, оскуолалары балаҕан ыйыгар диэри чөлүгэр түһэрэргэ, онуоха наада буолар матырыйааллары хааччыйарга эттэ. Хас биирдии нэһилиэнньэлээх пууҥҥа таас чоҕу куурдарга, дезинфекциялыыр сириэстибэни хааччыйарга улахан болҕомтону ууруҥ диэтэ.
Дьааҥы куорат дьаһалтата даамба тутуутун туруоруста, даамба суох буолан уу ылбытын быһаарда. Дьиҥинэн куорат даамбатын бырайыактаах симиэтэтэ судаарыстыбаннай экспертизаны ааһан, 2021 сыллаахтан Уу ресурсаларын федеральнай ааҕыныстыбатыгар сытар эбит.
Уу ылан ааспыт сирин-уотун кэрийэн көрүү уонна олохтоохтору кытары көрсүһүү түмүгүнэн, Юрий Трутнев Баатаҕай бөһүөлэгэр халаан содулун туоратыыга суһал мунньаҕы ыытта. Федеральнай министиэристибэлэргэ, биэдэмистибэлэргэ уонна өрөспүүбүлүкэ салалтатыгар чопчу сорудахтары биэртэлээтэ. Бу туһунан Ил Дархан уонна Бырабыыталыстыба пресс-сулууспата иһитиннэрдэ.
-
0
-
0
-
0
-
0
-
0
-
0
