Уопсастыба

– Биһиги уу ылбыт сирдэрин, учаастактарын үөһээттэн көрдүбүт, нэһилиэнньэни кытары көрсөн кэпсэттибит. Бүгүҥҥү мунньах чэрчитинэн халаан содулларын туоратарга туох дьаһаллар ылыллалларын, үп-харчы төһө тиийэрин, нэһилиэнньэҕэ көмө хайдах оҥоһулларын истиэхпин баҕарабын. Уу аа-дьуо түһэр. Дьон хаһаайыстыбаларын сөргүтэллэригэр тугу оҥоруохха наадатын бииргэ көрүөхпүтүн наада, – диэтэ Юрий Трутнев мунньаҕы арыйыгар.

Ил Дархан Айсен Николаев төһө хоромньу оҥоһуллубутун ааҕар хамыыһыйа үлэтин туһунан иһитиннэрдэ.

– Алта бөһүөлэккэ хоромньуну ааҕыы үлэтэ түмүктэннэ, хаалбыт нэһилиэнньэлээх пууннарга эмиэ итинник үлэ ыытыллар. Кыра дохуоттаах дьоҥҥо төлөбүр оҥоһуллуута саҕаланна. Арассыыйа Үлэҕэ уонна социальнай сайдыыга министиэристибэтэ 1 мөл 800 тыһ солк. ыытта. Ону таһынан нэһилиэнньэ бары араҥатыгар материальнай көмөнү оҥорууну түргэтэтэргэ быһаарылынна. Олорор дьиэни-уоту чөлүгэр түһэрэр, суолу-ииһи сөргүтэр үлэлэр саҕаланнылар. Болҕомто бастатан туран, бөһүөлэк иһинээҕи суолларга, хочуолунайдарга, сылааһы биэрэр тыраассалары, социальнай эбийиэктэри чөлүгэр түһэриигэ ууруллуоҕа. Ууга барбыт бөһүөлэктэргэ сылааһы эрдэ биэрии былааннанар. Бу бөһүөлэктэртэн олохтоохтор, бастатан туран, оҕолор, көһөрүллүбүттэрэ, 300-чэ оҕо Дьокуускай куорат чэбдигирдэр лааҕырдарыгар аҕалыллыбыта. Саха сирин Быыһыыр сулууспатын уонна Арассыыйа ЫБММ-тин быыһааччылара нэһилиэнньэҕэ аадырыстаах көмөнү оҥороллор, – диэтэ Айсен Николаев.

Салгыы Дьааҥы куоратын халаантан көмүскүүр инженернэй тутуу боппуруоһун көтөхтө. Наадалаах докумуоннар 2021 сыл атырдьах ыйыгар Уу ресурстарын федеральнай агентствотыгар бэриллэн, көрүүгэ сыталлар эбит. Онуоха Юрий Трутнев итинник быһыы сатаммат, бу боппуруостар баһаар уонна халаан балаһыанньатын мунньаҕар өссө көрөр наада диэтэ. Бу туһунан Ил Дархан уонна Бырабыыталыстыба пресс-сулууспата иһитиннэрдэ.