Саха сиригэр бэтэринээринэй сулууспа тэриллибитэ быйыл 125 сылын туолар. XIX үйэ бүтэһигэр диэри Европаҕа бэтэринээр быраастары мэдиссиинэ институтун иһинэн аһыллыбыт анал салааҕа үөрэтэр эбиттэр.
Дерпт университетын бэтэринээрийэҕэ салаатын бүтэрбит Вольдемар Густавович Гольман мэдиссиинэ Саха сиринээҕи иниспиэксийэтигэр бэтэринээр бырааһынан ананан, сыл аҥарын быһа айаннаан, 1853 сыллаахха кэлбит. Киэҥ-нэлэмэн сиринэн тайаан сытар уһук хотугу дойду сүөһүтүн-аһын көрүүгэ-харайыыга көмөлөһөргө туһаайыллыбыт идэлээх исписэлиис, бастакы бэтэринээр быраас, манна 31 сыл устата үлэлээбит. Хас да омук тылын билэр киһи сахалыы да быһаарсар буолбут, нэһилиэнньэҕэ бэркэ сөбүлэппит. Саха сиригэр сүөһү ыарыыларын туһунан научнай үлэлэри сурукка киллэрбит. Ол курдук «Заметки о якутском коневодстве» (1871) , «О болезнях домашних животных в Якутской области» (1872), «Сведения о падеже лощадей и рогатого скота в Средневилюйском улусе» (1889) диэн ыстатыйалары суруйбут. Саха омук бэйэтин олорор усулуобуйатыгар сөп түбэһиннэрэн ууһатан иитэр ынах сүөһүлээх уонна сылгылаах эбит диэн өйдөбүлү киэҥ эйгэҕэ таһаарбыт. Дьокуускайга бастакы буойунаны туттарбыт, онно куорат сүөһүтэ өлөрүллэр, доруобуйатын туруга көрдөрүллэр, быһаарыллар буолбут. Итинэн сүөһүттэн ылыллар бородууксуйа идэтийбит таһымынан бэрэбиэркэлэниитэ саҕаламмыт.
Арассыыйа импиэрийэтигэр 1897 сыллаахха бэтэринээрийэни мэдиссиинэттэн араарар туһунан сокуон тахсыбыт. Ону олоххо киллэрии чэрчитинэн, Саха сиригэр 14 үлэһиттээх бэтэринээринэй сулууспа тэриллибит, Дьокуускайга бастакы бэтэринээринэй лечебница аһыллыбыт. Бу кэмҥэ Казань куораттааҕы бэтэринээринэй институту бүтэрбит Сергей Яковлевич Дмитриев үлэлиирэ, кини барыта 23 сыл устата үлэлээбитэ. Саха сиригэр бэтэринээринэй-санитарнай кэтээн көрүү үлэтэ дьэ ити сылтан тэриллибитинэн ааҕыллар. Быйыл 125 сылын туолар.
- 0
- 0
- 0
- 0
- 0
- 0