Ол ыйын 26 күнүнээҕи туругунан, барыллаан ааҕыынан, Дьааҥы улууһугар 428 олорор дьиэ, ол иһигэр 333 чааһынай дьиэ, 95 элбэх кыбартыыралаах дьиэ, 18 социальнай эбийиэк эмсэҕэлээбит. Миэстэҕэ тэриллибит хамыыһыйалар ууга ылларбыт социальнай эбийиэктэр, олорор дьиэлэр туруктарын көрбүт. Дьааҥы уонна Кэбээйи улуустарыгар таһаарыллыбыт хоромньу кээмэйин быһаарар экспертиза уонна симиэтэ түмүктэрэ сотору кэминэн бигэргэниэхтээх.
Тутуу миниистирэ Павел Кылатчанов социальнай эбийиэктэри уонна олорор дьиэни-уоту чөлүгэр түһэриигэ төһө тутуу матырыйаала ирдэнэрин ааҕыы бүгүн түмүктэнэрин эттэ. Экология, айылҕаны туһаныы уонна ойуур хаһаайыстыбатын миниистирин солбуйааччы Эдуард Пихтин иһитиннэрбитинэн, Дьааҥы улууһугар халаантан 2 170 киһи эмсэҕэлээбит. Сайабылыанньалары хомуйуу от ыйын 13 күнүттэн саҕаламмыта. Бу сарсыардааҥҥы чахчынан, 5 154 сайабылыанньа хомуллубут. Ол иһигэр, 2 992 сайабылыанньа биир кэмнээх материальнай көмөҕө, 2 156 сайабылыанньа бастакы наадалаах малы-салы сүтэриинэн харчынан көмөҕө, 6 сайабылыанньа доруобуйа туругар бэриллибит. Билиҥҥитэ 680 сайабылыанньаҕа быһаарыы ылыллыбыт, 165 сайабылыаннаҕа аккаас бэриллибит.
Дмитрий Садовников дьон көрүллүбүт харчыны уталыппакка ыларын туһугар, үлэни суһалсытар соругу туруорда. Дьааҥы улууһун баһылыга Гаврил Чириков бэҕэһээ төлөбүр харчыта поселениелар счеттарыгар ыытыллыбытын, онон бүгүҥҥүттэн бэриллэрин туһунан эттэ.
-
0
-
0
-
0
-
0
-
0
-
0
