Үгэс курдук бу улууска оттук сезона атырдьах ыйын 25 күнүттэн саҕаланара. Чөлүгэр түһэрэр үлэни түмүктээн, оттук сезонун эрдэ саҕалыыр инниттэн ОДьКХ эбийиэктэригэр наада буолар матырыйаал илдьиллибит. Салгын аалларынан барыта 14,8 туонна тиэхиньикэ уонна тэрил тиэрдиллибит. Ону таһынан таас чоҕу буртовкалыырга (куурдарга) эбии тиэхиньикэ тардыллыбыт.
«ОДьКХ» судаарыстыбаннай-унитарнай тэрилтэ чахчытынан, Дуулаҕалаахха хочуолунайы чөлүгэр түһэрэн, боруобалаан оттон көрбүттэр. Үҥкүр сэлиэнньэтигэр теплотыраассаны сөргүппүттэр. Атын нэһилиэннньэлээх пууннарга хочуолунай хаһаайыстыбатын чөлүгэр түһэрии үлэтэ тэтимнээхтик ыытыллар, сотору кэминэн барыта бэлэм буолуо.
– Улууска кулун тутарга диэри туһаныллар таас чох саппааһа баар. Баатаҕай бөһүөлэгиттэн Дьааҥы куоратыгар диэри суол үчүгэй, оттон атын нэһилиэктэргэ кыһыҥы суол тохсунньуттан аһыллар, – диир ОДьКХ уонна энергетика министиэристибэтин Энергетикаҕа, суһал хонтуруолга уонна олох-дьаһах бэлиитикэтигэр департаменын салайааччыны солбуйааччы Вячеслав Долгунов.
Бу туһунан ОДьКХ уонна энергетика министиэристибэтин пресс-киинэ иһитиннэрэр.
- 0
- 0
- 0
- 0
- 0
- 0