Туйахтаах кыыллар кубуоталарыгар сайаапкалары хомуйуу бэс ыйын 1 күнүттэн от ыйын 1 күнүгэр диэри ыытыллыбыта. Мэҥэ Хаҥалас улууһугар көрүллүбүт кубуота улууска бэйэтигэр сэрэбийиэпкэлэнэр 35 %-ыттан тиксээри, төхтүрдэр ыһыахтыыр сирдэригэр 200 сааһыт муһунна. Уон киһилээх анал хамыыһыйа үлэлээн, ол иһигэр, түөрт уопсастыбанньык, сэрэбийиэпкэни нэһилиэк дьаһалтатын сөбүлэһиитинэн, итиннэ ыытарга быһаарбыта.
От ыйын 27 күнүгэр булчуттары улуус баһылыгын бастакы солбуйааччы Семен Потапов, Экология, айылҕа туһаныы уонна ойуур хаһаайыстыбатын министиэристибэтин улуустааҕы тэрилтэтин-иниспиэксийэтин салайааччыта Антонина Никитина, булчуттар улуустааҕы уопсастыбаларын бэрэссэдээтэлэ, Нэһилиэнньэ дьарыктаах буолуутун киинин салайааччы Прокопий Марков уонна Дьаҥхаады нэһилиэгин баһылыга Василий Стручков эҕэрдэлээтилэр. Бэйэтэ байанайдаах булчут, алгысчыт Спиридон Григорьев-Илгэлээх Испирдиэн алгыс сиэрин-туомун толордо, хас биирдии булчукка булта тосхой диэн Баай Байанайтан көрдөстө.
35 % 74 лисиэнсийэ буолар. Онуоха үс тайах (биир 1 сааһыгар диэри), үс кыыл таба (биир 1 сааһыгар диэри), 60 туртас (ол иһигэр, 9 атыыр уонна 1 сааһыгар диэри 18 кыыл), аҕыс хотугу таба (икки 1 сааһыгар диэри) уонна үс хагдаҥ эһэ кубуотаҕа ыйыллан сылдьалларын Антонина Никитина чуолкайдаата.
Улууска тыырыллыбыт кубуота 35 %-ын Дьокуускайга электроннай киэбинэн ыытыллар сэрэбийиэпкэтэ күүтүллэр.
Биотехническэй тэрээһиннэргэ ‒ кыылларга бурдугу, тууһу кутуу, оту биэрии уонна суолларын-иистэрин көрүүгэ үлэлээбит дьоҥҥо уочараты таһынан түҥэтиллэр 30 % быһаарыллан турар. Кубуота улууска көрүллэр ахсаана ити кыыллар суолларын-иистэрин көрүү кэнниттэн, барыллаан ааҕыллан бэриллэр.
Аркадий Иннокентьев, Майа сэл.
Хаартыскаҕа Гульнара Аммосова түһэриитэ
-
0
-
0
-
0
-
0
-
0
-
0
