Ааспыт өттүгэр ирдэниллэр экземплярдары электроннай киэбинэн Арассыыйатааҕы Кинигэ палаататыгар (ИТАР-ТАСС салаатыгар) уонна Арассыыйа судаарыстыбаннай библиотекатыгар ыыталлара. Билигин ИТАР-ТАСС салаатыгар ыытар тохтотулунна. Ити кинигэни, хаһыаты таһаарааччылар үлэлэрин судургутуо уонна дойдуга бэчээттэнэр кинигэлэр, хаһыаттар электроннай пуондаларын тэрийэргэ, култуура нэһилиэстибэтин сыыппара технологиятынан харайарга тирэх буолуоҕа диэн Бырабыыталыстыба быһаарар.
Ирдэниллэр федеральнай экземплярдары харайыы уонна туох бэчээттэммитин туһунан иһитиннэрэр библиографическай ыйынньыктары таһаарыы эбээһинэһэ эмиэ Арассыыйа судаарыстыбаннай библиотекатыгар сүктэрилиннэ. Кинигэ палаатата кини салаата буолла. Арассыыйатааҕы Кинигэ палаататын 30 тыһыынча кв миэтэрэ иэннээх хранилищетыгар 80 мөлүйүөн докумуон, Арассыыйа судаарыстыбаннай библиотекатын хранилищетыгар 27 мөлүйүөн докумуон сытар, нуорма быһыытынан 8-10 мөлүйүөн буолуохтаах. Онон саҥа, киэҥ хранилищелары тутуу олох ирдэбилэ буолбут.
Маны таһынан, Култуура министиэристибэтин уонна Арассыыйа судаарыстыбаннай библиотекатын кэккэ боломуочуйаларын чопчулуур Бырабыыталыстыба дьаһала тахсыбыт. Онон, докумуоннар ирдэниллэр экземплярдарын тарҕатыы, бэчээттэммит бородууксуйа, фонограмма, видеокиинэ ирдэниллэр экземплярдарын Арассыыйа судаарыстыбаннай библиотекатыгар тиэрдии быраабылаларын Култуура министиэристибэтэ оҥорор буолла диэн «Парламентская газета» сайт суруйар.
-
0
-
0
-
0
-
0
-
0
-
0
