Ол курдук, муус устар 1 күнүттэн Бырабыыталыстыба хамыыhыйата мелованнай кумааҕыга, бэчээттиир пленкаларга уонна полиграфическай кырааскаҕа киллэриллэр таможеннай пошлиналар нулевой ставкаларын кѳтүрбүтэ. Онон хаhыаттары, сурунааллары уонна кинигэлэри бэчээттээhин сыаната улаатыаҕа, ол аата полиграфия атыыланар сыаналара үрдүк буолуохтара.
Арассыыйаҕа полиграфия ырыынага пандемия кэмигэр ыарахаттары кѳрсүбүтэ. Оттон ааспыт сылга биhиги дойдубутун сааҥсыйаларынан блокировкалааhынтан арыычча ѳрүтүннэ. Салаа импортан улахан тутулуктааҕа биллэн таҕыста. Арҕааҥҥы дойдулар сааҥсыйалара наадалаах матырыйааллары, анал тэрили уонна киниэхэ деталлары, полиграфическай кырааскалары уонна лаахтары, целлюлозаны, кумааҕыны обработкалыыр препараттары уо.д.а. тиэрдиини уустугуртулар.
Ааспыт сыл ортотуттан кинигэни оҥорон таhаарыы сыаната 20-30 бырыhыанынан улаатта. Ол тэҥинэн хаhыаттары уонна сурунааллары бэчээттиир балачча ыараата, кинилэр тиражтара уонна кээмэйдэрэ түстэ.
Кумааҕы уонна кырааска сыаналара улаатар, бэчээттиир массыыналарга сапчаастары атыылаhыы уонна тиэрдии ыараан иhэр. Олохтоох бэчээт бородууксуйатын оҥорон таhаарааччылары индийскэй тэрилгэ кѳhѳргѳ ыҥыраллар, ол эрээри оннооҕор бѳдѳҥ хампаанньаларга ол уустук.
Цифровой медиа сайдарын үрдүнэн, Арассыыйаҕа бу күҥҥэ 40 тыh. кэриҥэ периодическай бэчээт таhаарыылара тахсаллар.
Онуоха бэчээттээhиҥҥэ эрэ кыhалҕа баар буолбатах. Москва к. суруналыыстарын Сойууhун бэрэссэдээтэлэ Павел Гусев билигин сурутуу институтун хаалларар уонна сайыннарар, хаhыаттары уонна сурунааллары тиэрдии аныгы ньымаларын туттар, комплекснай бырагыраама оҥоhуллар наадалааҕын бэлиэтээтэ.
Дойду кумааҕыны оҥорон таhаарааччыларын Госдумаҕа ѳйүүргэ бэлэмнэр. Хаhыаттары бэчээттээhини субсидиялыыр наадатын эрдэ РФ Уопсастыбаннай палаататыгар эмиэ дьүүллэспиттэрэ. Боппуруос быhаарыыны күүтэр.
Хаартыска аhаҕас источниктан ылылынна.
-
0
-
0
-
0
-
0
-
0
-
0
