50 сыллааҕыта бу күн тустуук Роман Дмитриев Мюнхеннааҕы Олимпийскай оонньууларга кыһыл көмүс мэтээлинэн наҕараадаланан, сахаттан бастакынан олимпийскай чөмпүйүөн буолбута. Ол улуу кыайыы чиэһигэр анаммыт үөрүүлээх миитиҥҥэ өрөспүүбүлүкэ салалтата, норуот дьокутааттара, Роман Михайлович доҕотторо, аймахтара, спортсменнар муһуннулар.
Ил Түмэн Бэрэссэдээтэлин бастакы солбуйааччы Александр Жирков бэйэтин эҕэрдэтигэр өрөспүүбүлүкэҕэ маассабай спорт хамсааһынын тэрийсибит Николай Тарскай: «Сотору кэминэн саха ыччаттара олимпийскай үрдэлгэ тахсыахтара – кинилэринэн дойду киэн туттуоҕа, кинилэр ааттарын Аан дойду билиэҕэ» диэн өтө көрөн эппитин, Роман Дмитриев олоххо киллэрбитин санатта.
– Бүгүн саха норуотун өрөгөйүн күнэ. Манна мустубут дьонтон үгүскүт лоп курдук 50 сыл анараа өттүгэр Роман Дмитриев олимпийскай чөмпүйүөн буолан, өрөспүүбүлүкэ дьоно-сэргэтэ барыта өрөгөйдөөбүтүн өйдүүргүт чахчы. Көҥүл тустууга Роман Дмитриеви батыһааччылар баар буолбуттара. 1976 сыллаахха Монреаллааҕы олимпиадаҕа Павел Пинигин чөмпүйүөннээбитэ, Александр Иванов призердаабыта. Салгыы Владимир Торговкин, Леонид Спиридонов, Виктор Лебедев, Айаал Лазарев онтон да атын тустууктарбыт кыттыбыттара, төрөөбүт дойдуларын, норуоттарын албан аатырдыбыттара, – диэтэ Александр Николаевич итиэннэ саха ыччаттара спорт атын көрүҥнэригэр эмиэ ситиһиилээхтик кытталларын бэлиэтээтэ.
– Роман Михайловиһы кытары мин үчүгэйдик билсэр этим. Кини киһи быһыытынан кэрэ, дириҥ өйдөөх-санаалаах, муударай киһи быһыытынан бары бодоруспут дьонун, доҕотторун сүрэхпитигэр иҥэн сылдьар. Роман Михайлович туһунан сырдык өйдөбүл ыччаты саҥа кирбиилэргэ, кыайыыларга угуйар чаҕылхай сулус буолуохтун, – диэн этиитин түмүктээтэ.
Салгыы физическэй култуура уонна спорт миниистирин бастакы солбуйааччы Александр Бугаев, киин куорат баһылыга Евгений Григорьев, Роман Михайлович төрөппүт кыыһа Марина Крылова тыл эттилэр.
Роман Дмитриев Мюнхеннааҕы олимпиадаҕа чөмпүйүөннээбитэ 50 сылын бэлиэтээн, Дьокуускайга, төрөөбүт дойдутугар Эдьигээҥҥэ уонна үөрэммит, тустуук быһыытынан уһаарыллыбыт сиригэр Чурапчыга үөрүүлээх тэрээһиннэр ыытылыннылар. Балаҕан ыйын 9-11 күннэригэр «Триумф» спорт киинигэр олимпийскай чөмпүйүөн Роман Дмитриев сырдык аатыгар 2002-2004 сыллаах төрүөх юниордар ортолоругар көҥүл тустууга Бүтүн Арассыыйатааҕы күрэхтэһии буолуоҕа.
Ил Түмэн пресс-киинин матырыйаалынан
-
3
-
0
-
0
-
0
-
1
-
0
