Ил Дархан Айсен Николаевка Үөһээ Бүлүү улууһун сылгыһыттарын аһаҕас суруга
Издательский дом Редакция Подписка
Погода в Якутске: . -41 oC

Биһиги эрэдээксийэбитигэр Үөһээ Бүлүү улууһун сылгыһыттарын «Үрүҥ сылгы» ассоциациятыттан Ил Дархан Айсен Николаевка аадырыстаммыт аһаҕас сурук киирдэ.

Биһиги эрэдээксийэбитигэр Үөһээ Бүлүү улууһун сылгыһыттарын «Үрүҥ сылгы» ассоциациятыттан Ил Дархан Айсен Николаевка аадырыстаммыт аһаҕас сурук киирдэ.

Ытыктабыллаах Айсен Сергеевич!

Килиимэт сылыйыытынан итиэннэ олох-дьаһах хаамыытынан сибээстээн, сылгыны үөрдээн иитиигэ кэнники сылларга кэккэ уларыйыылар таҕыстылар. Сылгы иитиитэ – саха омук түҥ былыргы үйэлэр улаҕаларыттан илдьэ кэлбит төрүт дьарыга. Саха сылгытын этэ, үүтэ (кымыһа) киһи доруобуйатыгар туһалаах эттиктэринэн олус баай, өлбөт мэҥэ уутун кэриэтэ буолар. Бу ордук пандемия кэмигэр күүскэ билиннэ, тыа сирин олохтоохторо, куорат да дьоно сыанатын кэрэйбэккэ атыылаһаннар, убаһа уонна сылгы этинэн аһааннар, доруобуйаларын туругун бөҕөргөтө, иммунитеттарын күүһүрдэ сатыыллар. Онон, саха сылгыта норуот доруобуйатын араҥаччылааччы диэтэххэ омун буолбат.

Биһиги, Үөһээ Бүлүү улууһун сылгыһыттара, Дьөһөгөй оҕотун араҥаччылыыр, сайыннарар, ахсаанын элбэтэр сыалтан «Үрүҥ сылгы» диэн ассоциацияны тэринэн үлэлии-хамсыы сылдьабыт.

Саха сылгытын сайдар ис кыаҕа улахан, сирбит-уоппут киэҥ, ону көдьүүстээхтик туһаннахпытына, сылгыбыт ахсаана Монголия, Казахстан сылгытыттан итэҕэһэ суох буолуон сөп. Билигин өрөспүүбүлүкэбит сылгытын ахсаанынан Арассыыйа Федерациятыгар инники күөҥҥэ сылдьар, онон кэнэҕэскитин саха сылгытын суотугар Арассыыйа сылгытын ахсаанынан Аан дойдуга бастыыр даҕаны кыахтаах.

Тыа хаһаайыстыбатын ханнык баҕарар салаата сайдарыгар бэтэринээринэй эмтиир-сэрэтэр үлэ тиһигэ итиэннэ адьырҕа кыыллары утары охсуһуу быһаарар суолталаахтар. Дьэ бу дьаһаллары тэрийэргэ сылгы ким бас билиитигэр сылдьара ааҕыллыбат, тоҕо диэтэххэ, туох эмит ыарыы турбутун эмтииргэ биитэр ханна эмит бөрөлөрү бултаһарга «бу чааһынай дьон сылгыта, ити тэрээһиннээх хаһаайыстыба бас билиитэ» диэн араарар, хайаларын эрэ матарар буоллахха, ыытыллар үлэ ситэтэ суох буолуо, хобдох түмүктэниэ. Ити курдук, сылгы чопчу территорияларынан көрүллэрэ салаа биир сүрүн уратыта буолар.

Тыа хаһаайыстыбатын министиэристибэтэ тэрээһиннээх эрэ хаһаайыстыбалары өйүүр бэлиитикэтэ сылгыны үөрдээн итии бу уратытын төрүт учуоттаабат. Иккис өттүттэн ыллахха, тустаах хаһаайыстыбалар кыахтара кыратынан, чааһынай сылгыны кэпэрэтииптэргэ түмүү кыайтара илигинэн, хас биирдии улууска, нэһилиэктэргэ сылгы иитиитин сайыннарарга төһүү буолуохтаах учаастактар туһаныллыбакка сыталлар.

Биһиэхэ тирэх наада. Кэтэх ыаллар сылгыларын өйөөһүн ырычааҕа оҥоһуллара буоллар, сылгы ахсаанын элбэтэргэ, нэһилиэнньэни этинэн хааччыйыыны тупсарарга, эр дьону үлэнэн хааччыйыы кыһалҕатын быһаарарга итиэннэ сопхуос эстиэҕиттэн быраҕыллан сытар ыраах учаастактары туһаҕа таһаарарга бигэ тирэхтэниэ этибит.

Былырыын тыа хаһаайыстыбатын табаарын оҥорооччуларга өйөбүл саҥа мэхэньиисимэ киллэриллэн, үүккэ көрүллэр субсидия харчыта үрдэтилиннэ итиэннэ кэтэх ыаллар ыанар ынахтарын ахсыгар, ороскуот сорох чааһын толуйуу быһыытынан, 35 тыһ. солк. субсидия көрүллэр буолла. Бу дьоһуннаахай өйөбүлгэ тирэҕирэн, өрөспүүбүлүкэҕэ ынах сүөһү, чуолаан ыанар ынах ахсаана элбиирэ, сүөһүнү иитиигэ сыһыан тосту уларыйара ситиһилиннэ.

Үөһэ этиллибиттэри учуоттаан, сылгыны үөрдээн иитиини сайыннарар сыалтан, кэтэх ыаллар биэлэрин ахсыгар эмиэ маннык көмөнү оҥорор туһунан боппуруоһу үөрэтэргэ көрдөһөбүт.

«Үрүҥ сылгы» ассоциация толоруулаах дириэктэрэ Яна Иванова.

2022 сыл, балаҕан ыйын 5 күнэ.

Үөһээ Бүлүү сэлиэнньэтэ.

Салгыы ассоциация чилиэннэрэ, барыта 104 киһи, илии баттаабыт

  • 7
  • 0
  • 0
  • 0
  • 0
  • 0

Комментарии (0)

Никто ещё не оставил комментариев, станьте первым.

Оставьте свой комментарий

  1. Опубликовать комментарий как Гость.
Вложения (0 / 3)
Поделитесь своим местоположением

Другие новости

Спецпроекты

Саха Сирин «Олохтоох каадырдары промышленноска» бырайыага эдэр ыччаты үлэнэн хааччыйыы бастың практикаларын Бүтүн Россиятааҕы куонкуруhун финалыгар таҕыста

«Олохтоох каадырдары промышленноска» ѳрѳспүүбүлүкэтээҕи бырайыак ыччаты үлэнэн хааччыйыы…
07.12.22 20:49