Быйылгы быыстапка-дьаарбаҥка бу кэлэр өрөбүллэргэ, ол эбэтэр балаҕан ыйын24-25 күннэригэр Хомсомуол болуоссатыгар буолуоҕа. Киин куораттан уонна улуустартан чааһынай, бааһынай хаһаайыстыбалар, тыа хаһаайыстыбатын кэпэрэтииптэрэ, астыыр-таҥастыыр тэрилтэлэр итиэннэ аныгы алаас оҕолорун иитэн таһаарар агро-оскуолалар бэйэлэрин бородууксуйаларын: үүт-эт, бурдук астарын, балыктарын, мүөттэрин, чэйдэрин, оҕуруоттарын аһын уо.д.а. аҕаланнар атыылыахтара.
– Быйылгы быыстапка-дьаарбаҥка Саха Өрөспүүбүлүкэтин уонна Тыа хаһаайыстыбатын министиэристибэтин 100 сылларыгар ананар. Бас билии көрүҥүттэн тутулуга суох бары хаһаайыстыбалары, АПК тэрилтэлэрин, астыыр-үөлүүр хампаанньалары бу дьоһун дьаһалга кытталларыгар ыҥырабыт. Быыстапка-дьаарбаҥка үлэни-хамнаһы сырдатыы, бородууксуйаны батарыы, ырыынагы үөрэтии итиэннэ кэҥэтии биир көрүҥэ буолар, – диир тыа хаһаайыстыбатын миниистирин солбуйааччы Артем Александров.
Быыстапка-дьаарбаҥка бырагыраамата киэҥ: тыа хаһаайыстыбатын бородууксуйатын атыытын таһынан, племенной сүөһү быыстапката итиэннэ АПК тэрилтэлэрин уус-уран самодеятельноһын кэнсиэрдэ буолуоҕа.
Балаҕан ыйын 24 күнүгэр АГАТУ былаһааккатыгар дьоҕус дьаарбаҥка тэриллиэҕэ, балаҕан ыйын 25 күнүгэр ипподромҥа Тыа хаһаайыстыбатын министиэристибэтин бирииһигэр ат сүүрүүтэ ыытыллыаҕа.
-
3
-
0
-
0
-
0
-
0
-
0
