2002 сылтан нэһилиэк сылын аайы халаан уутугар барара. Дьон олоҕор кутталы туоратар сыалтан уонна нэһилиэнньэлээх пууну сылын аайы чөлүгэр түһэриигэ өрөспүүбүлүкэ бүддьүөтүттэн ороскуотурбат туһугар 2017 сыллаахха СӨ бырабыыталыстыбата Березовканы уу ылбат үрдүк кырдал сиргэ көһөрөр туһунан быһаарыы ылбыта.
Ил Дархан Айсен Николаев оробуочай сырыытыгар Бөрезовканы көһөрүү үлэтин кытары билистэ. Ол туһунан СӨ Бырабыыталыстыбатын пресс-сулууспата иһитиннэрэр. Орто Халыма улууһун баһылыга Евгений Слепцов үлэ күөстүү оргуйарын туһунан эттэ. “Уу ылбат үрдүк сиргэ оскуола тутулунна, икки кыбартыыралаах олорор дьиэлэр. Бу дьиэлэргэ биир бастакынан хаһаайыстыбалара ууга барар ыаллары көһөрдүбүт. Быйыл социальнай эбийиэктэр, элбэх кыбартыыралаах олорор дьиэлэр, хочуолунай дьиэтин, фельдшер-акушер пуунун тутуулара бара турар уонна суол-иис оҥоһуллар”, -- диэн кини билиһиннэрдэ.
Березовка саҥа сэлиэнньэтигэр 15 олорор дьиэ тутуллубут, фельдшер-акушер пууна 2020 үһүс кыбаарталыгар үлэҕэ киирэрэ былааннанар.
- 0
- 0
- 0
- 0
- 0
- 0